Shillong, July 9: Assam a·doko matchurangko chel·chakna dingtangmancha niamko ra·gatahaoba, gipin a·dokrangoniko Meghalaya a·dokona matchurangko ra·baanio maming neng·nikani dongjawa ine Sukrobar salo, a·dokni Chief Minister Conrad K Sangma parakataha.

Matchurangko naljoke rakkina gita adita salrangna skangsan Assam Cabinet, Bill-ko pass ka·manahachim.

Indake ong·engon, Meghalaya a·dokna matchurangko watatenggipa dingtang dingtang a·dokrang, jekai West Bengal, Andhra Pradesh, UP, Telangana aro uandakgipa a·dokrang baksa Meghalaya sorkari agangrikmanaha aro matchurangko Assam gita Meghalaya a·dokona ra·baanio maming neng·nikani dongjawa ine Chief Minister parakataha.

“Assam-o dingtangmancha niamko ra·gatahani gimin Meghalaya a·dokona matchurangko ra·baanio maming neng·nikanirang dongjana gita chinga sorkarini gita ja·kurangko de·anggen,” ine Sangma aganaha.

Assam a·doko matchurangko naljoke rakkina gita maikai ja·kurangko de·na siengachim, uko ma·sie ra·na gita Meghalaya sorkari, Assam-ni cow protection bill-ko nie ra·gen ineba Chief Minister parakataha.

“Assam-o niamko ra·gatanichi an·chingni a·doko neng·nikanirangko man·na nanggenchimode chinga Assam sorkari baksasan ong·aigija ma·mong sorkari baksaba agangrike cholrangko tarichina mol·molgen. Indiba Assam-o tarigimin niamrangkoba chinga nichengna nanggen,” ine Sangma aganaha.