Shillong, July 1: Shillong songjinmani Mawdiangdiang-o gital rikenggipa Assembly building-na chamgimin koros baridapahani gimin CBI-chi inquiry dakna gita sorkariko didichina HYC dol, Assembly-ni Speaker Metbah Lyngdoh-o dabiangaha.

HYC-ni parakatani gitade, Assembly building-ko rikani bidingo RTI ka•e am•sandion, ia Assembly building-ko rikna a•bachengo chamgimin gong kror 105-oni ja•mano gong kror 127-ona tang•doange bon•kamaode gong kror 141-ona bariatskaahachim.

Indake ong•engon, ia matchotkugijagipa Assembly building-na da•o dipet gong kror 160-na baten tangka paisarangko koros ka•aha aro da•o dipet chu•gimik koros ong•aniara gong kror 177 ong•aha ineba HYC-ni RTI ka•anio ma•sina man•aha ine u•iataha.