Shillong, March 20: Sombar salo, Budget Session-ni skanggipa salo, Meghalaya Governor-ni Hindi ku·sikchi aganprakaniko jegale Voice of the People’s Party (VPP)-ni MLA-rang, Assembly-oni ong·katgrimaha.

Assembly-ni Speaker Thomas A Sangma, a·dokni Governor Phagu Chauhan-ko Hindi ku·sikchi aganprakna on·ahani gimin VPP-ni MLA sakbri, Assembly-oni ong·katgrime kataha.

Budget Session-ni skanggipa salo, a·dokni Governor, Hindi ku·sikchi aganprakna a·bachengon, VPP-ni MLA Ardent Miller Basaiawmoit, uni aganprakaniko dontongatenba English ku·sikchi aganprakchina aganahachim.

“Meghalaya a·dokara Hindi ku·sikko agangipa a·dok ong·ja ine anga Governor-na iachi u·iatna sikenga. Assam a·dok ong·engmiting somoion Assamese ku·sikko mongsonggipa ku·sik ong·atna Assam sorkari jotton ka·ahani giminsa an·ching a·dokni manderang aro dilgiparang Assam-oni ma·ekna nangnikaha. Uni gimin ia Assembly-o an·ching iako ja·rikna on·jachina anga an·tangde nangnikenga,” ine Basaiawmoit aganaha.

Khasi aro Garo ku·sikrangko Eighth Schedule-o chapatchina dabianiko India sorkari knachakjaengani gimin ian Meghalaya a·dokni manderangko nichanggalani gita ong·enga ine janapatengon, pilakni ma·sina man·gipa ku·sikchisa Governor-ko aganna on·china ua, Assembly-ni Speaker-ko didiangaha.

Indake ong·genchimoba, Assembly-ni Speaker Thomas Sangma, a·dokni Governor-ko Hindi ku·sikchi aganprakna on·angani ja·man VPP-ni MLA sakbrian, an·tangtangni kusi ong·gijaniko mesokna gita Assembly-oni ong·katgrime kataha.

“Hindi ku·sik agangipa governor-kosa ma·mong sorkari Meghalaya a·dokona watatenga aro iako chinga pilakande ma·sigiparang ong·ja. Ian chingko chonnikani gita ong·engani gimin chinga iano bak ong·pana man·jawa,” ine ja·mano VPP-ni MLA Ardent Basaiawmoit parakataha.

Opposition MLA-rangni iandakgipa kamna a·dokni Chief Minister Conrad K Sangma, suk ong·gijaniko parakatskaengon, a·dokni Governor English ku·sikko poraina man·jani gimin niamo pangchake ja·mano uni agangipa kattarangko English-chi pe·skaenba Assembly-na sualna man·gen aro iana membor-rang jegalna nangani katta dongja ine talataniko on·angaha.

“Saoba English-ko poraina man·jaode an·ching uko drae poraiatna man·jawa aro uni aganprakgipa kattarangko pe·skaenba Assembly-o sualna man·gen. Ua iako dakna sikede dakenga ong·ja indiba an·tang poraina man·jani giminsa dakenga. Saksa Governor-na iandake mande ra·gija mesokani nikna namen duk ong·a,” ine Sangma aganaha.