Guwahati, March 30: Tripura a·doko assembly tom·anio, kragijagipa video-rangko nianina Tripura BJP, uamangni saksa MLA Jadab Lal Nath-na ia mamlao aganchakaniko on·china show cause notice-ko sokatna tik ka·aniko Bristibar salo u·iatangaha.
Ja·pangoniko koborko man·soani gitade, ong·gija kamko ka·gipa Jadab Nath, assembly tom·ao chanchirimanirangko knajoljol an·tangni mobile phone-o sel·tagija noksarangko niroroahachim.
Iani bidingo aganchakaniko on·angengon, Tripura BJP-ni padot Pa Rajib Bhattacharya, uamang ia mamlani gimin party-ni dilgiparang baksa chanchirime MLA-ko iani gimin aganchakchina show cause notice-ko sokatna gita tik ka·aha aro uni aganchakaniko chu·ongnikjaode, chinga uni kosako rakgipa ja·kurangko de·atgen ine parakataha.
North Tripura district-ni ning·o donggipa Bagbasa assembly constituency-ni BJP MLA, Jadab Lal Nath, re·anggipa February jao Tripura a·doko eleksinko ong·atanggipao skanggipa changna seokako man·ahachim.
A·doko assembly tom·anio, BJP MLA-ni kragijagipa kamko ka·ani ian skanggipa chang ong·ja, iana skang 2012 bilsioba, Karnataka BJP-ni dilgipa Laxman Savadi-ko apsandaken, sakgipin minister CC Patil baksa sel·tagija video-rangko an·tangni phone-o sriksrik niako rim·a man·angahachim.
