Shillong, Aug 3: India a•songni jakgitelko man•aoni bilsi 75 gapaniko maniani bak gita Indian Army Umroi Brigade, ‘Red Horns Division’-ni ning•o dingtangmancha ‘Freedom Ride – Trans Meghalaya Monsoon Odyssey’ ine bimingko donenba motorcycle-rango re•jomaniko August 3 tarikoni 10 tarikona ong•atenga.
Ia motorcycle-rangko sale re•jomaniko dingtangmancha British-rangni sasononiko warachakna gita dakgrikdilanggipa Meghalaya a•dokni dilgiparangko man•chape a•songni jakgitelanina krengdilanggipa pagitcham ma•gitchamrangko mande ra•pilskana aro mittelpilskana gita ong•atenga.
Ia motorcycle-rangnin re•jomaniko, Indian Army aro manderangni gisepo meli-nangrimbatataniko ra•bana aro Meghalaya a•dokni chadamberangko Indian Army-o napchina didina gitaba ong•atani ong•enga.
Ia Motorcycle Ride-ko Budbar salo, Gajraj Corps-ni General Officer Commanding, Lieutenant General DS Rana, a•bachengate on•angaha aro ia motorcycle sale re•jomaniko Umroi Military Station-ni Station Commander, Brigadier KM Shende dilangaha.
Ia Motorcycle Ride-ko August-ni 10 tariko Meghalaya a•dokni Governor Satya Pal Malik-ni jakchi matchotate on•angskagen.
