Shillong, Feb 15: A·doko petrol aro diesel toni damrangko komiatchina dabienggipako a·dok sorkarini iana gisiko nangbregija dake dongaiengani gimin a·doko parana salruraenggipa dolni gimik sal 13-rang gape da·alona kingking jingjengataniko dakangkuengani a·sel Meghalaya-o manderangni ramram janggi tangbewalanio namen su·pekatani man·aha.
Da·al Sombar saloba apsandake uamangni konta 48-na kingking jingjengataniko a·bachengatachi garitangtangko sale ong·katgiparangna agrede songjinmani rama-sorokrango gari-gorarang komie bangbang ong·tokanichi a·dokko chalaianioba namen neng·nikaniko chagrongangna gita nangskaaha.
Janapjolna gita, petrol aro dieselni damrang gong·raken tang·dorikrikani gimin sorkarini kosako jegalenba a·doko sima-gri jingjengataniko dakenganichi songjinmao parana salruraenggipa manderang gari salaniko dontongattokahachim.
Iani gisepon, gari-gorarangni a·doko re·ruraaniko champengna ba golmal ka·na jotton ka·enggiparangni kosako ja·kurangko de·angna gita a·dok sorkari mikrakataniko on·angskaaha.
A·doko gari-gorarangni jakgitele re·ruraaniko golmal ka·na jotton ka·enggiparangni kosako rakgipa ja·kurangko de·angchina gita pilak deputy commissioner-rangkon agan-ge·etataha ine janapatan baksa, a·dokni manderangna bal-boja ong·aniko aditan ritchengatna miksonge petrol aro diesel toni damrangko komiate on·angkuna gita a·dok sorkari nigrike kamko ka·enga ineba Transport-ni Commissioner aro Secretary-ni kamko jako ra·enggipa mijalo koborna seachi u·iatgipao janapataha.
Iano pangchake, rama-sorokrango ramram manderangni re·ruraanirangko aro gari-gorarangni re·ruraaniko mamingchiba golmal ka·na jotton ja·pajachna East Khasi Hills-ni district magistrate Isawanda Laloo-ba jingjengatgipa dolo mol·molataha. Indake ong·engon, saniba ba dolni ia on·gimin ge·etanirangko pe·ako rim·a man·ode uamangni kosako raken ja·ku de·anggen ineba ua mikrakatjolaha.
