Shillong, Mar 4: Bangladesh a•song baksa bading chiwalgrikani, bida budi on•ani aro jatni daka rikaniko mangrakbatatna gita Guwahati-oni Mendipathar-ona tarianggipa rel ramako South Garo Hills a•jani headquarter Baghmara-ona aro uni ja•man Bangladesh a•songni skotong Dhaka songjinmaonaba tariangna man•na gita cholrangko sandichina didie, South Garo Hills a•jani MLA-rang, Meghalaya a•dokni Chief Minister Conrad K Sangma-na chittiko on•angaha.
Ia rel ramako Baghmara-ona aro Dhaka-ona bakrodapataniara ian South Garo Hills aro Meghalaya a•doknasan ong•aigija India a•songni salgro salaram jol gimiknan namgni ong•gen ine MLA-rang, Chief Minister-na seatgipa chittio parakataha.
“Baghmara aro Bangladesh a•songo donggipa Mymensing-ni gisepo chel•grikaniko niatgenchimode ian a•song damgnini simao ong•e, India aro Bangladesh a•songni gisepo rel ramako tarina sepangbatgipa biaprang ong•enga aro ia rel ramachi, a•songni damgnini gisepo bading chiwalgrikani, tourism aro bida budi on•grikaniko bilakbatatna man•gen,” ine South Garo Hills a•jani MLA-rang parakataha.
A•songni jakgitelaniko man•na skangde India aro Bangladesh a•songni gisepo bading chiwalgrikaniko ia jolrangon dakrongani gimin ia jolrangara bading chiwalgrikaniko bilakbatatna namgipa chol ong•a ineba MLA-rang parakataha.
Baghmara jillara Bangladesh a•songni simao donggipa Simsang chibimani jakrao ong•e Meghalaya a•doko mongsonggipa bading chiwalram gita ong•a ine janapatskaengon, ia biapara Bangladesh a•songni sambaon ong•ani gimin a•song damgnini simarango bading chiwalgrikna namgipa biap ong•a aro Baghmara-o Integrated Check Post (ICP)-ko songanichi manderangni re•ruraani aro bostu salruraanirangko nambate nirok sandina man•gen ine MLA-rang parakataha.
Bangladesh-oni Baghmara-ona sepangbatgipa railway station-ara, Mymensing Division-o donggipa Jaria Railway Station ong•a ine janapatskaengon, Baghmara-oni Jaria-ona rel ramako tarigenchimode a•song damgnini gisepo re•a doani, bading chiwalgrikani aro pilak kamrangon altubatgnokchim ine SGH MLA-rang parakataha.
Baghmara aro Dhaka-ona rel ramako tarianggenchimode SAARC, BIMSTEC, ASEAN aro Indo-Pacific a•songrang baksa Tourism-o bakrimaniko bilakbatatna cholko oe on•ani gita ong•gen ineba MLA-rang parakatenba, iani bidingo India sorkarini Railways Ministry baksa agangrikchina Chief Minister Conrad K Sangma-ko mol•molataha.
Na·simang ia video-koba nina man·gen:
Na·simang iakoba poraina man·gen: ‘Wa•pong Sika’ aro ‘An•ding Oka’ kal•susaaniko ICFAI Tura-o ong•ata
India A·songni Salgro Salaram A·dokni gitalgipa koborrangko ma·sina sikode na·simang hubnetwork.in, oniko video-ko niangan baksa poraina man·gen.
Chingko ka·mao mesokgipa social mediarango jarikna man·gen:-
Twitter- twitter.com/nemediahub
