Baghmara, Oct 25: Mongolbar salo, Meghalaya a•dokni skanggipa Chief Minister Captain Williamson A Sangma sagini chang 32-gipa siani salko, uni atchiram Baghmara-ni Captain Williamson Memorial Park-o gisik ra•e maniangaha.
Capt Sangma-ni siani salko manianio Baghmara-ni MLA Samuel M Sangma, mongsonggipa sokgipa ong•e tom•anio bak ra•giparangna aganprakangengon, Meghalaya a•dokko man•na gita Capt Sangma sagini an•tangko on•kange ka•dilanggipa kamrangni gimin gisik ra•atpilaniko on•angaha.
Meghalaya a•dokko namroro silroroatanide da•o a•doko songdongenggipa manderangni jakosajok ine janapatengon, Meghalaya a•dokko namroro silroroatanio a•doko songdongenggipa pilak manderangkon ku•cholsan ong•e kamko ka•china Sangma didiangaha.
Ia salko gisik ra•e manianio dingtang dingtang dilgiparang Capt Sangma-ni mangkrongo, pul bibalrangko aro malarangko pate una mande ra•pilskaanirangko dakangaha aro South Garo Hills District Police Force-ni gitaba una mande ra•pilskaaniko dakangaha.
Ia tom•anio dongpae jinmana aganprakanggipa gipin manderangara, Baghmara-ni Block Development Officer Jerico N Sangma, Baghmara Ampang Mangsang Maharini-ni president Rev Jither M Sangma aro gipinrang ong•a.
