Shillong, Feb 5: A·dokni dingtang dingtang obostarangko ra·chimonge Meghalaya Democratic Alliance (MDA) sorkarini kosako rokom-rikkit dake jaksi ote matnanganirangko BJP dilgiparangni dontongjaengani gimino a·dokni dakchakgipa skotong minister Pa Prestone Tynsong-ko iarangchi sko ding·doatenba saffron party-ko suk ong·nikteljaode MDA-oni ong·kate re·angsrangchina gita agana draataiaha.
“Meghalaya a·doko niam gri koela cho·atani aro minggipin cha·bokani mamlarango BJP dolni matnanganina, a·doko sorkariko bakrime rikanio maming chu·ongnikani dongjaode ba suk ong·nikchongmotjaode MDA-ko watangna man·aigen,” ine Pa Tynsong una raken aganchakangskaaha.
Garo Hills Autonomous District Council (GHADC)ko challaianio ning·in-ning·in cha·bokani kamrang gnang ine National People’s party (NPP)chi rikdilenggipa MDA sorkarini kosako jaksi ote matnanganirangko ra·bae BJP dolni sing·doaniko dakanganina Pa Tynsong iana jasa skangba apsandakgipa kattakon aganahachim.
“Anga apsan kattakon da·oba agana, MDA sorkari baksa bakrime rikanio maioba chu·ongnikjaode ka·sapae wate re·angpabo,” ine ua agantaipilaha.
Janapna gita, mija January 21 tariko salaram Jaintia Hills a·jao koelarangko niam gri cho·srukanio Assam-oni sakdok manderang koela a·damo kam ka·mitingo rasong gribee rang·gitik a·sel-obostako chagrongachi janggi-jamako gimaatanio adita salrangna skangsan a·dokni BJP dolni padot Pa Ernest Mawrie ia pilak ong·enganirangko nirokatna ja·manchakaniko janape a·dokni Home Minister Pa Lahkmen Rymbui-ko kam watchina dabiangahachim.
