Tura, Feb 5: Baghmara C&RD Block ni ning·o donggipa song 13 ni manderang MGNREA oniko an·tangtangni hajira man·gniko jakkale Rompa Dolongko kachina 2018 bilsion namnike bilko on·ahaoba sajinmani a·sel kam ka·giparang dongjaenba re·anggipa bilsiode pilak kam ka·anirangkon dongtongna ga·akaha jeni a·selan uko rikchakatna tarisamsoanirangko mikka wachi somoio nosto ong·ataha.

Indakgipa obosta ong·ahanichi chi nalsao donggipa song 13 ni seokako man·gipa dolgiparang Baghmara C&RD Block ni Block Development Officer ko gronge uko rikchakatpiltaichina mol·moleahachim indiba da·alonan ua maming ja·kukon ga·kuja. Indake chingko ma·ekate galchipanina chinga ka·a be·a ine Mindikgre songni songsalna kam ka·gipa Pa. Greneth M. Sangma jinmani palo kobor rangona seachi u·iataha.