Shillong, Feb 5: Meghalaya Residence Safety and Security Amendment Bill (MRSSAB)-an ia somaio a·dokna nangchongmotgipa ong·enga ine aganenba, adok sorkari iako ra·chakatani gimin ma·mong sorkari baksa agangrikchengna nangbatenga maina Inner Line Permit (ILP)ni giminde ja·manoba chanchiangna man·aigen ine Meghalaya-ni Governor Pa Satyapal Malik mijalo aganaha.

“Anga an·tang skotong minister ong·ode, MRSSAB-na skanggipa ma·mong sorkarini ra·chakataniko am·chenggenchim, ILP-ni giminde ja·manoba kamko ka·angna man·aigen” ine a·dokni Governor Pa Satya Pal Malik mijalo Raj Bhawan-o kobor ra·timgiparangna aganaha.

Inner Line Permit (ILP)ko ja·manchina done agananio, MRSSAB-ara darangna maming neng·nikaniko ra·bagipa bill ong·ja ine aganenba, ua iani giminde mamingkoba dakna man·ja maina home ministry-ko didiangna gita ian a·dok sorkarini jakosa chu·gimik ong·aia ine ua aganskaaha.

Batanggimin bilsio state assembly-o tom·aniko ong·atango jinmani namnike ra·chakanggimin Meghalaya Residence Safety and Security Amendment Bill (MRSSAB)-ara ma·mongni bil on·e ra·chakataniko man·kujaeming da·o indaken dongaienga.

“Bill-ni gimin aganengon, ong·katanggipa Governor iana an·tangni soiko on·angjani gimin ma·mongni jako indaken dongaienga, uni gimin angaba uamangni kosako mamingkoba dakna man·ja. A·dok sorkarini iako union home minister baksa agangrikchengani ja·man home ministry-oniko ge·etaniko man·ode anga iana mamingo jechakani dongjawa ine ua ka·dongataniko on·aha.

Ru·utgija salrangna skang union home minster-ko uni grongbaani gimin sing·on, home minister namen chanchininge kam ka·gipa mande ong·e a·dokni skotong minister baksa MRSSAB-ni gimin ua agangrikna nangnikbatenga ine home minister angna agane on·ataha aro anga iako CM-na u·iatenba na·a doangeming unbaksa (HM) agan-golpogrikebo aro mol·molebo ine aganaha, ine Pa Satya Pal Malik aganchakaha.