Shillong, Feb 5: Ku·rachakgimin gita, home minister Pa Amit Shah-ko grongna gita Home Ministry-o somaiko choljokate on·china didiangna a·dokni skotong minister Pa Conrad K. Sangma bakan a·songni skotong songjinma Delhi-china doangna gita tariaha aro apsandaken dakchakgipa skotong ministerba da·al salni bakon Delhi-china doangenga.
Ma·mongni home minister Pa Amit Shah-ko Delhi-o grongangna gita chief minister-ni office-oni iana skangan home ministry-o somaiko choljokate on·china am·ataha ine dakchakgipa skotong minister Pa Prestone Tynsong u·iatahachim.
Delhi-china doangna skang, a·dokni dingtang dingtang mamlarangni bidingo agan-golpogrikaniko dakjolna gita skotong minister Pa Conrad Sangma, mijal Bristibar salo Shillong, Raj Bhawan-o a·dokni Governor Pa Satya Pal Malik-ko grongangaha.
Governor-ko grongani ja·man Pa Sangma, Inner Line Permit (ILP) aro minggipin dingtang dingtang a·dokni mamlarango Ma·mong sorkari baksa agan-golpogrikna ua ia anti Robibar salon Delhi-china doanggen ine u·iatenba, PWD, agriculture aroba gipin department-rang baksa nangchapgipa neng·nikani mamlarangko agan-golpogrikna dingtang dingtang ma·mongni ministerrangkoba grongbajolgen ine ua an·tangni Delhi-china doangnasiani gimin koborni manderangna taldapataha.
Iana skang, dingtang dingtang dolrangni dabienggipa Inner Line Permit (ILP)na ageba a·dokko namroro-silroroatanina adita nangchongmotgipa project-rangni giminba kamrangko gong·rakchina su·dodoaniko on·angna gita bang·a dingtang dingtang ma·mongni minister-rangkoba grongbajolna somairangko am·ataha ine dakchakgipa skotong minister Pa Prestone Tynsong u·iatmanahachim.
