Shillong, April 20: Re·anggipa March jani 23 tarikoni April 17 tarikona kingking, chong·motan gimik sal 25 somoirangni gisepon COVID sajinmani mamlarang a·doko rang·san tang·dotaiaha ine Health Services-ni Director Dr. Aman War, Mongolbar salo parakataha.
Dr. War-ni aganani gitade, re·anggipa bilsini apsan somoirang baksa nisusaatode, sabisiko man·anirang ianpako namen baridapaha.
Namjabegipa sajinmani mamlarang a·doko rang·san baritaiengani a·sel namen jajrengsoaniba ong·enga aro iako champengsona gita pilak tarisamsoanirangko dakna nanggen ine aganengon, re·anggipa bilsio sabisini mamlarang 600 batna sal 114 somoirangko nangahachim, indiba ianpakode bang·gija somoirangni gisepon sabisini mamlarang rang·san tang·doanichi namen jajrengsona nangao ga·akenga ineba ua aganaha.
Ia somoirango an·tangtangna aro manderangni an·seng-baljokanina pilak simsaksoanirangko dakna aro dongimin niamrangko raken ja·rikna nangchongmotenga ine aganenba, manderangko an·tangtangni an·seng-baljokanina dingtangmancha simsaktokchinaba ua didianiko on·angjolaha.
