Shillong, July 8: Meghalaya a•doko da•o obostarang namkalbataha aro batanggimin jagniko tosusae nigenchimode a•doko COVID-19 man•giparang komibataha ine Health Services (MI)-ni Director Dr Aman Warr parakataha.

“An•chingni a•dokde gipin a•dokrang baksa dingtanggrika maina gipin a•dokrangode COVID man•giparang tang•dodate ja•mano komiangaha indiba an•chingode iandake ong•ja. Ia pilakan kenchakna nanggipa manderangko sandie porikka ra•e positive ong•ani a•sel ong•enga. Badita positive ong•gipa manderangko chinga man•gen, ugitan chinga sabisini giproroaniko champengna kamrangko ka•skana man•a,” ine Dr Warr aganaha.

Meghalaya a•doko da•o obostarang namkalengahaoba mikrake donganiko watgalna nangkujawa ineba Dr Warr parakataha.

“Da•ona bate obostarang namkalkuja dipet batanggimin jagittamna chinga jekai mikrake kamrangko ka•engachim, apsan daken kamrangko ka•angkugen,” ine Health Services-ni Director aganaha.

COVID-19 man•aniko komiatani gimin janapatengon, ia positivity rate-ko komiatna gita bang•bata manderangkon porikka ra•e niangkuna nanggen ine Dr Warr parakataha.

Je manderangkon porikka ra•e nichina aganengachim, uandakgipa manderang positive ong•enganiara namgipa chin ong•a ineba Dr Warr aganaha.

“Manderang positive ong•genchimosa chinga sanna bananirangko on•e ia sabisini giproroaniko champengna man•gen,” ine ua aganaha.

Mask-rangko ganjringani, saksa sakgipinoni chel•tanggrike dongani aro rongtal an•taljringe donganichisa COVID-19-ni giproroaniko champengna man•gen ineba Dr Warr, mikrakataniko on•angtaiaha.

“Batanggimin bilsio gita ong•gija ia bilsiode coronavirus ta•raken dingtangataha. Maini a•sel ong•aha, iako ma•sina gitade name sandina nanggen indiba ian namen namjabegipa obostao ong•enga,” ine Dr Warr aganaha.

Manderang tikarangko su•e ra•genchimode dingtanganiko nikna man•gen ineba ua aganaha.