Tura, Jun 29: Garo Hills-ni rockband-rangko ra·dona miksonganio, dingtangmancha ‘Battle of the Bands 2025’ beat contest-ko Sonibar salo, Tura-ni District Auditorium-o ong·atangaha.
Ia ‘Battle of the Bands 2025’-ko ong·atna Meghalaya a·dokni Chief Minister Conrad K Sangma, ‘Chief Minister’s Special Grant’-oniko tangka paisarangko dakchake on·ataha aro ia beat contest-ko Wrath Befall Music Society nambee chu·sokataha.
Ia beat contest ba dingtang dingtang rockband-rangni doksusaanio, bak ra·na gita Garo Hills gimikoni dol 23 rockband-rang register ka·ahachim indiba dolgnide sokbajae, dol 21-san bak ra·angaiaha.
Ia ‘Battle of the Bands 2025’-o Garo Hills-o doka dam·anina niksenggipa manderang, chong·motan Rough Road-ni Silvan Sangma, Tura Music Academy-ni Director Tengrang R Sangma, Ultimate Page-ni Reynold M Sangma aro Restless Desire-ni Rem D Shira, judge ong·e, rockband-rangni doka dam·ani aro ring·anirangko niangaha.
Ia beat contest-ko ong·atanio, National People’s Youth Front (NPYF)-ni working president Dabo M Marak, mongsonggipa sokgipa ong·e, tom·anio bak ra·giparangna aganprakangengon, chadamberangni changa sapanirangko nike an·tangni kusi ong·aniko parakangaha aro chadamberangni changa sapanirangko nambatatna gita iandakgipa program-rangko ong·atna nangani gimin aganangaha.
Chadamberangni changa sapanirangko ra·dona aro ong·gija ramarango dilsretako man·jana gita sorkarini ra·gatgipa Meghalaya Grassroots Music Project (MGMP), jekon da·o Chief Minister’s Grassroots Music Program (CMGMP) ine mingskaahachim, iani giminba Marak, jinmana agan-talatanirangko on·angaha.
“CMGMP gita dakgipa program-rango tangka paisarangko koros ka·anichi a·dokni chadamberangna dakchakanirangko on·na man·enga aro mitam chatro chatrirangde da·o iandakgipa program-rango bak ra·en, an·tangtangni college fee aro nok pararangkoba gamna man·paengaha,” ine ua aganaha.
Mikkangchiba iandakgipa beat contest-rangko ong·atangkuna gita sorkari, tangka paisarangko dakchake on·angkugen ineba ua ku·rachakaniko on·angaha.
Ia ‘Battle of the Bands 2025’-o Tura-ni Nyctophilia dol chegipa ong·e, gong 50,000 tangkarangko boksis dake man·angaha aro unbaksana Emberfall dol 1st Runner Up ong·e gong 30,000-ko aro V-Aura dol 2nd Runner-Up ong·e gong 20,000 tangkarangko boksis dake man·angskaaha.
Una agreba ia beat contest-o, Best Vocalist-ni boksisko Snowball Effect-ni Sid Ampabni, Best Lead Guitarist-ni boksisko V-Aura dolni Balkimra Chikambe Ch Sangma, Best Rhythym Guitarist-ni boksisko Nyctophilia-ni Carlo Ch Marak, Best Bassist-ni boksisko Emberfall-ni Jordan R Sangma, Best Drummer-ni boksisko Nyctophilia-ni Treslong N Sangma aro Best Keyboardist-ni boksisko Di-Eros dolni Aiesho Demetius S Marak man·angenba, uamang sakprakan gong 5000 ka·e tangkako boksis dake man·angaha.
Battle of the Bands 2025 matchotani ja·man, Guwahati songjinmaoni re·bagipa ‘Arsenic’ dol, gitrangko ring·e manderangko an·saoatangskaaha.
Na·simang ia video-koba nina man·gen:
Na·simang iakoba poraina man·gen: Uttarkashi-o mikkarang jimbee waanichi ra·a ruanio labour camp nangchakeako man·a
na·simang hubnetwork.in, oniko video-ko niangan baksa poraina man·gen.
Chingko ka·mao mesokgipa social mediarango jarikna man·gen:-
Twitter- twitter.com/nemediahub
Instagram- www.instagram.com/ne_media_hub
