Hub News Exclusive
Tura, Oct 20: Bangladesh a·songo Sheikh Hasina sorkari be·gruani ja·man A·chikrang neng·bee janggi tangna nangtokenga ine Hub News, Bangladesh a·songni saksa A·chik mande (bimingko parakna nangnikjaenga) baksa golpoanio ma·sie ra·na man·aha.
Ia mandeni u·iatani gitade, ia sal somoirango Bangladesh a·songo songdongenggipa A·chik nokdangrangoni 80 percent-de nokoni ong·kate gipinrangni ning·osa kamrangko ka·e cha·na nangtokenga aro a·ba/a·a dongkalgipa 20 percent A·chikrangde bagan barirangko dake ba game ge·e janggi tangtokpaenga.
“Je A·chik nokdangrangan skangonin game ge·e cha·paengachim, ia manderangni obosta da·o namjaenga maina uamangni gama ge·anirangchi koros de·nan neng·ani ong·enga. Una agreba basakobade bang·batgipa jatni bobil dakgipa manderang, gama ge·anirangko nosto ka·e galrongengani gimin bang·a A·chik manderangan bagan barirangko daknaba kentokenga,” ine ua aganaha.
Ia mandeni u·iatani gitade, je manderangan chengoni maming a·a patta (lekka) gri songdonge, game ge·e cha·tokengachim, uandakgipa manderangde da·o neng·nikanirangko chagrongna nangbattokenga maina da·o gital niamode patta ba lekka donggijagipa a·arangko sorkarini a·arang inesa chanengaha aro a·a patta donggijagipa manderangkode ua biaprangoniko a·rikgalengaha.
Tangail district-ni Modhupur jolrango aro Indo-Bangla simani Sherpur district-rango iandakgipa a·selrang ong·batenga ineba ua parakataha.
“Je nokdangrangan sorkari aro NGO sector-rango kam ka·e cha·enga, uandakgipa nokdangrangde cholikalenga. Sorkario kam ka·giparangoni mongsongbate nurse aro primary assistant teacher-ni gadango kam ka·giparang bang·bata aro unbaksana doctor, banking sector-o kam man·giparangba donga. Civil service-ni kamna cholko man·giparangba sak 30-na baten donga. NGO sector-ko agangenchimode, Kristiano pangchakgipa NGO-rang, jekai Caritas, World Vision, Confession, PARI Development Trust, Bangladesh Bureau, World Concern aro uandakgipa NGO-rango kam ka·giparangba donga, dingtang dingtang karkanarango kam ka·giparangba donga aro chona rema bading chiwalanirangko dake cha·enggiparangba donga,” ine ua aganaha.
Politics-o bak ong·gipa A·chik jong-adarangni bidingo janapatskaengon, A·chikrangni gisepo jemangan Awami League party-ko ja·rikachim, uamangde re·anggipa August 5 tariko, Sheikh Hasina-ni kam watani ja·man gimikan katbrange dongna nangtokenga aro nokdangni gipin manderangsan songnoko tom·tome dongna man·paenga ine ia mande parakataha.
“Jemangan Bangladesh National Party (BNP) ba gipin party-rangko ja·rikachim, uamangde da·oba mamingna kengijan dongtokenga indiba bang·skaja,” ine ua aganaha.
Songsalna kam ka·gipa association ba dolrangni gimin janapatskaengon, “Tribal Welfare Association (TWA), ian a·kawe jolrango Tribal-rangni namgnina rikgimin mingsa Tribal dol ong·achim, indiba ia dol adita bilsirangonin bakgni ong·e meligrikna man·jaenga aro iani a·sel Tribal-rangni gisepon meligrikna man·jaenga,” ine ia mande parakataha.
Bangladesh a·songo A·chikrangni jelbra jelsuaniko janapatskaengon, a·songo songdongenggipa A·chikrangni gimin sorkari pangnan komiate report-ko on·genchimoba Bangladesh a·songo A·chikrang lak 1.5-na baten donga aro iani gisepon hajal 30-40-mangni gita A·chik manderang, Modhupur minggipa jolosan tom·dake dongenga aro iana agre gipin A·chik manderang, dingtang dingtang biaprango pripraesa songdong a·chatokenga ine ua parakataha.
“Iandake dingtang dingtang biaprango priprae songdong a·chatokani a·selan nangan somoirango A·chikrang saksa sakgipinko dakchakgrikna man·ja indiba je biaprangon A·chikrang tom·dake ku·cholsan janggi tanga, uandakgipa biaprangode nangan somoirango ku·cholsan chakatna aro bobilrangkoba warachakna man·aia,” ine ua aganaha.
Sheikh Hasina sorkari be·gruani ja·man Bangladesh a·songo toromni gita sinjetaniko nikna man·enga ineba ua parakataha.
“Political obostao pangchake adita A·chik songrangko ka·mikkenata aro manderangni nok-jam aro a·arangkoba ra·sekna jotton ka·anirang donga. Sherpur district-ni song damsa donga, jeon ka·mikkenatako man·e da·oba jrip dongenga. Gipin jatrangna kene katta aganna aro social media-rango gipatna on·jaenga. Mija antiosan anga ua songona re·ange video ka·e sing·sandina am·on angko beng·toka aro iandakgipa obostarangko bang·a A·chik songrangon nikna man·enga. Ia jagnini gisepo anga an·tangba ‘Kristian Garorang India-chi katbo’ inako knajok aro chinga jrip dongana agre mamingkoba dakpana man·jaenga,” ine ua aganaha.
Bangladesh a·songo A·chik songrangni gisepo mingsinggipa Askipara songo, ‘Podomorol’ minggipa mande saksani depanteni nokkoba ma·sina man·gijagipa sak 25-30 manderang, walni somoio chadrapna re·bae pe·e galna aro ra·seke ra·na jotton ka·aha aro songsul noksulrang chrik a·bokani ja·man ia manderang re·angpilahaoba ja·mano re·bapiltaina ku·chinge donangaha ineba ua parakataha.
“United Nations-ni niam aro recognize ka·a gita Bangladesh a·songo songdongenggipa pilak chonchongipa jatrang, an·tangtangko Tribal/Uopjati ingija Indigenous ine Bangladesh-ni constitution-o recognize ka·china ru·uta bilsirangonin dabiengachim indiba Bangladesh sorkari, da·alonan iako knachakjaenga. Bangla ku·sikchi ‘Upojati’ inon sub-tribe ba sub-nation-kosa miksonga indiba Bangladesh a·songo songdongenggipa A·chik aro gipin chonchongipa jatrangde Bengali jatoni ong·katjachim. Indide maini gimin ‘Upojati’ ine recognize ka·gen? A·chik aro gipin chonchongipa jatrangko Indigenous ine Constitution-o ra·gatchina re·anggipa September jaoba A·chik chatro chatrirang Mymensing-o rally ka·ahachim aro constitution-o indigenous ine ra·gatgenchimode sorkarini on·enggipa adita cholrangkoba man·pagenchim,” ine ua mande parakataha.
Bangladesh a·songo da·o pilakni gita obosta mai rokom ine sing·anina aganchakaniko on·angskaengon, ia sal somoirango Bangladesh a·songni obosta namjaenga ine ua an·tangni nikaniko aganaha.
“Sheikh Hasina sorkari be·gruani ja·man Bangladesh a·songo pilakni gitan so·sojengjeng ong·enga. Interim government bilona re·baani ja·man a·songo niam retirangba be·gruaha. Bang·a koidirang pattokoni indin watako man·aha. Ma·sina man·gijagipa manderang pattokrangko pe·e koidirangko jakgitel wataha. Chittagong Hill Tracts-o donggipa Tribal-rangni kosako sipai dolrang skangna bate bilakbate sason ka·na a·bachengaha. A·songni so·sojengjeng ong·anio da·o dipet sak 20-mangni gita Tribal-rang sina nangaha. Sheikh Hasina-ni Awami League party-ni dilgiparangko rim·tokengjok. Bang·a dilgiparang gipin a·songrangona katangtokaha, bang·a dilgiparangan so·otako man·aha aro da·oba uamangko so·ote galaigen,” ine ua aganaha.
Dingtang dingtang karkanarangni gimin janapatskaengon, Bangladesh a·songo da·o bading chiwalani kamrang namen tang·onangaha, chola ba·ra tarigipa karkanarang chipatako man·aha, ia karkanarangoniko order ka·enggipa client ba bregiparang, gipin a·songrangona jitangskajok ine ua mande aganaha.
Sheikh Hasina sorkari be·ani ja·man Bangladesh a·songo songdongenggipa Hindurangba kenchipchipe janggi tangna nangtokenga ineba ua parakataha. “Bang·a Hindurang so·otako man·aha, ra·seke ra·ako man·aha aro a·rike galako man·tokaha. North Bengal-ni Hindu-rangde India a·songchi katnapna miksonge simaona sokangahachim indiba sorkarini order dongjani gimin BSF sipairang, border gate-ko kulie on·jaha,” ine ua aganaha.
Lekka porani bidingo janapatskaengon, Bangladesh a·songo lekka porani a·bako Islamic dolrang ra·sekna a·bachengaha aro syllabus-oba Islam-ko on·na chanchiengjok ine ua aganaha.
“Sheikh Hasina sorkarini somoio dongnue donggipa Islamic political party-rang da·o jinmana paraken kamrangko ka·engjok aro Bangladesh-ni bang·bata manderangan Islamic dolko support ka·tokengaha. Mikkangchi Bangladesh a·songo Islamic political dolrang sorkariko rikna nangode gipin torom aro jatrangde janggi tangna neng·gnok ine niksamsona man·engaha,” ine ua aganaha.
Ia mandeni aganani gitade, Bangladesh a·songo so·sojengjeng ong·a intalan me·su samjak aro ma·manti bosturangni damba namen tang·doaha, bijolirangba chu·ongjaha aro manderang dingtang dingtang dake neng·nikanirangko man·na a·bachengaha.
“Bangladesh aro India a·songni gisepo relationship ba bakrimani da·o namjaha aro pilakni gitan meligrikna man·gijaniko nikna man·engaha. India sorkari, Bangladesh a·songni manderangna visa on·ako dontongjok aro medical visa-kosan da·o India sorkari on·engaha,” ine ua aganaha.
Bangladesh a·songo election-ko ong·atani gimin janapatengon, “Sheikh Hasina sorkari be·ani ja·man Yunus interim sorkariko rikon, pilak political dolrangni bak ra·anichi namgipa bewalo election-ko ong·atna aganahachim indiba da·ode a·songni constitution-ko taridapna nanggen, a·songni tom·tomkujana kingking bilo dongkugen aro dos dakgipa manderangna sastirangko on·kujana kingking election-ko ong·atkujawa ine aganskaengaha. Iani bidingo, Bangladesh Nationalist Party (BNP), Jamat Islami, Hefajot Islami, Bangladesh Muslim League, Islamic Front Bangladesh, Islami Andolan Bangladesh, Bangladesh Jatiyo Party aro uandakgipa dolrangde Yunus sorkarini kosako suk ong·gijaniko parakna a·bachengaha. Awami League party-na chakenggipa manderang, Sheikh Hasina-ko rimbapilchina dabie, Dhaka aro dingtang dingtang biaprango rally-rangko ong·atenga,” ine ua aganaha.
Na·simang ia video-koba nina man·gen:
Na·simang iakoba poraina man·gen: Sikkim a•doko patient saksani okoniko kenchi man•a
India A·songni Salgro Salaram A·dokni gitalgipa koborrangko ma·sina sikode na·simang hubnetwork.in,-oniko video-ko niangan baksa poraina man·gen.
Chingko ka·mao mesokgipa social mediarango jarikna man·gen:-
Twitter- twitter.com/nemediahub
Youtube channel- www.youtube.co
Instagram- https://www.instagram.com/ne_media_hub
