Shillong, June 20: Assembly Committee for Women Empowerment-ni Chairperson Ma Ampareen Lyndoh, Meghalaya a·doko Women Commission, Child Protection Commission aro Police dolni gisepo nangrime kam ka·ani dongja ine June 20 tarik-o aganaha.
Shillong Nongrah-o bi·sa sakgniko pagipani so·otani bidingo Meghalaya Legislative Assembly Women Empowerment-ni komittee, Meghalaya police-ni skotong, Child Protection Commission aro Women Commission Chairperson-ko gronge golpogrikangaha.
Bi·sa sakgniko so·otani mamla-ni bidingo Commission ge·gni chairperson-ko aro DGP-ko a·selni bidingo talataniko on·china okamaha aro dolgittamni dilgiparangan damsan asonge agangrikchina aro uamangni chanchie ra·bagiminko sal 15-ni gisepo ra·bachina ge·etaniko on·aha ine Ma Lyngdoh aganaha.
Noktango jeba ka·namgija dosi dakaniko aro doka satani a·selrangko Police department-ona apoti ka·ako man·on uko namrenge ra·na nangjawa ineba Ma Lyngdoh aganaha.
A·sel ong·anio sianggipa sakgni bi·sarangni nokdangna sorkari lakh 5 prak on·gen ine Committee-na ui·atmanaha ineba Ma Lyngdoh talatdapangaha.
