Shillong, May 4: A·doko bijoliko kimitna nanganichi bang·a neng·nikanirangko chagrongenganio ian sorkarini chu·gimik sasonni ning·o ong·ja, indiba ia neng·nikanirangko namatna gita sorkari kamrangko ka·atenga ine Meghalaya-ni Power Minister Pa James Sangma, Sombar salo aganaha.
Iani bidingo kobor setimgiparangna Sombar salo agananganio, “mikkangchi bijoli kimitaniko chagrongna nangjana gita chinga amadipet jotton ka·enga, indiba agangimin gita dingtang dingtang a·selrangni giminsa bijoliko kimitna gita nangenga aro indakgipa a·selrang chingni chu·gimik sasono ong·ja,” ine Pa James aganaha.
Re·baenggipa sal-somoirango a·doko da·o gita bijoli kimitaniko chagrongna gita nangjawaha ine ua an·tangni ka·dongsoaniko parakange, wachi-karini somoio mikka-bitchirang chu·onga gita wana nangenganiko ua aganskaaha.
Bijoli kimitengani gimin sing·anina aganchakanga baksanaba, Umkhrah chibimako tangatpilani gimin, chi chimongchakgipa biaprangni nosto ong·angengani gimin aro buringo sikar ka·giparangko warachakna forest official-rangna silchidarerangko on·ani giminba minister aganangjolaha.
River rejuvenation programme-ni gita chibimarangko tangatpilani gimin department cholrangko sandie kamrangko ka·enga ine Forest and Environment minister-ba ong·enggipa Pa James Sangma, Sombar salo aganangaha.
Umkhrah chibimako tangatpilani gimin aganengon, iako dakna altubea kam ong·jawa, maina iako forest department mangmangchi ong·ja indiba Urban Affairs, Soil and Water Conservation, Water Resources aro Forest and Environment department-rang gimik melie kamrangko ka·na nanggen ine Pa Sangma aganaha.
Chini moila ong·aniko nirokatengani gimin sing·on, “Jokbaenggipa chibimaona acid jokaniko komiatna gita iako nirokatanirang aro champenganiko dakatanirang donga ine anga bebera·a. Acid jokaniko maikai champenggen ukosan ong·aija, indiba chi chimongchakgipa biaprangna maichi naljokanirangko on·gen iani giminba Forest department baktangko niroke kamrangko ka·atenga ine aganchakaha.
Minggipin, chibimarango chimongegipa bang·bata chi chimongchakgipa biaprang namen jajrengsognigipa obostarango ong·tokenga aro iarangna da·onin kamrangko ka·chakatna nangengaha ine forest minister agandapaha.
“Je a·nokgiparangni gamni ning·on indakgipa biaprang ga·akachim, chi chimongchakgipa biaprango buringrangko ong·atna man·na gita sorkari baksa nangrime kam ka·na gita jak on·tokchina uamangko mol·molna nangnika, jedakode a·bigilni cham·anganiko aro uandakgipa chi chimongchakgipa biaprangni nosto ong·angenganiko komiatna man·gen,” ine Pa Sangma aganaha.
“Iana mangsonga gnang kam ka·anio, indakgipa a·arangko sandiata mangmanchi ong·ja, indiba a·nokgiparangko ma·sie ra·na nangani giminba ong·enga. Chi chimongchakgipa biaprangni nosto ong·roroanganiko aro buring-bolgrimrang komiroroanganiko maidakode champengna man·gen iani gimin mangsonganiko done kamrangko ka·na nangenga,” ineba Pa Sangma agan-talataha.
Unbaksana, buringo sikar ka·giparangko warachakna forest officerrangna silchidarerangko on·china Supreme Court-ni mol·molani gimin sing·anina aganchakanio, a·doko da·ororo bobil dolrang komianichi tom·tomaniko niate iani giminba chanchianirangko dakenga ine Pa James Sangma aganchakaha.
Bobil dolrangni bilake kam ka·miting somoio, buringo sikar ka·giparangko nirokna gita forest guard-rangna on·gipa silchidarerangko ra·seke katanirang dongaha ine janatapenba iarangni a·selsa forest guard-rangna silchidarerangko on·aniko dontongatahachim, indiba a·doko da·o tom·tomangahani gimin nambate kamtangko ka·angna man·na gita forest guard-rangna silchidarerangko on·piltaiani gimin chanchipilenga aro ia proposal-ni gimin da·o kamrangko ka·engaha, ine forest minister u·iatjolaha.
