Shillong, May 13: Bilsi 18 oni bilsi 44 ong·giparango sajinmani tikako su·chakataniko parakangani ja·man, tika su·nasigiparang agre bang·ahani gimin Shillong songjinmana chamgimin tikarang gimikkon a·kanggopaiaha ine Meghalaya sorkari Bristibar salo u·iataha.
Ia bilsirangni gisepo ong·gipa manderangna May jani 14 tarikoni dipet tikako su·chakatgen.
Iani bidingo a·dokni dakchakgipa skotong minister Pa Prestone Tynsong-ni u·iatani gita, a·dokni gipin district-rangonikoba, bilsi 18 oni bilsi 44 ong·giparangni ia tikako an·tangtango su·angtokna nangnikenganiko niksona man·aha.
“A·doko songdongenggipa mande sakantikon tikako su·ani salo, agre seksekjachina mol·molna sika, maina segatgimin mobile nomborrango tikako su·angnasigipa manderang iani bidingo chu·gimik u·iatanirangko man·soani cholko chinga tariaha,” ineba Pa Tynsong u·iatkuaha.
Sabisini tikako su·anggnigipa manderang uamangni mobile-rango man·sonasigipa u·iatanirangko aro agan-ku·pattianirangko namedake ja·rikna nanggen ineba ua agandapataha.
Bi·atgimin gimik pong hajal 42,000 tikarang a·dokona sokbatokaha aro koros ong·anikoba gamataha ine a·dok sorkari mija Butbar salo u·iatangaha. Ia sokbagimin tikarangko manderangna indin su·angtoknaba sorkari tik ka·aha.
