Shillong, May 13: India a·songni gipin a·dokrango da·ororo COVID-19 sajinmani giproroanichi mande sianirang namen bariengon, sigimin manggisirangko so·chakna gitamangba salgro-salaram a·dok Meghalaya-ode bang·a neng·nikaniko chagrongna gita nangskaenganiko parakangaha.
Beben a·doko da·odipet gipin biaprango gita ong·gija sabisi man·giparang aditan komikuengoba, salsa-batbat sabisiko man·giparangni tang·dorikrikaniko niate ian namen jajrengsona nanggipaba ong·taiskaenga aro apsandake, Covid saa man·e sianggiparangba batroroengani a·selo sigimin manggisirangko so·nan sengna nangengani gimino Hindu jatrangna mongsongbate neng·nikaniara ianonin a·bachengskaenga.
Shillong-ni gimin aganengon, Hindu jatrangna sigimin manggisiko so·chakna gita da·odipet damgni biaprangsan dongengkua, uarangoni ge·sara Electric Shamshaan Griha aro ge·gipinara, skangoniko ja·rike dakbaenggipa so·chakram biap Mawprem-ni Shamshaan Griha Mukti Dham, iarang ong·a.
Indake ong·engon, da·ororo sabisi man·e sianggipa manggisiko so·na gita a·dokni administration, uamangna Jhalupara Mawbah-o donggipa bijolini bilchi manggisiko so·chakgipa Shamshan Ghar-osa mangmang so·na gita bilko on·aiaha.
Iani bidingo Greater Shillong Crematorium & Mortuary Society-ni padot Pa Jayanto Lal Das baksa agangrikon, sabisi man·e sigiparang batroroengani a·selo songjinmao donggipa Electric Crematorium-ko man·adipet ta·raken namdapatna ba ra·dona gita nangchongmotengaha ine ua aganaha.
Jayanto Lal Das-ni aganangkuani gitade, Shillong electronic Crematorium-o bijolini kajinako bang·en gamna nangani a·sel tangka-paisaoba namen neng·nikaniko chagrongenga aro manggisiko so·na dam tik ka·giminoniko man·enggipa tangka-paisarangkon bijolina gaman baksa kam ka·giparangnaba uonikon betonrang on·enga. Mande saksani manggisiko so·ani apsan salon Covid saa man·e sianggipa sakgittamni manggisirangko man·soskaenga. Uni gimin, da·o donggipa electronic crematorium-ko a·dok sorkari bakbakan ra·doatjagenchimode re·baenggipa salrango da·ona bateba namen kenbegni somoirangko chagrongnasienga ineba ua agandapataha.
