Shillong, Mar 16: Manipur a•doko bakrime sorkariko rikna gita Bharatiya Janata Party (BJP) okamgenchimode, National People’s Party (NPP)-ba sorkario bakrimaniko on•gen ine Budbar salo, Meghalaya a•dokni Chief Minister aro NPP-ni national president Conrad K Sangma parakataha.

Manipur Assembly-o gimik dam 60 seat-rangoni dam 32 seat-rangko chee BJP dol, bang•batgipa ong•engachim aro adita salrangna skang ong•atanggipa Manipur election-o NPP dolba damsni seat-rangko cherikahachim.

Ma•mongo, Arunchal Pradesh-o aro Meghalaya a•dokoba NPP, BJP baksa bakrime sorkariko chalaienga ine janapatengon, Manipur a•dokoba BJP, NPP-ko okamgenchimode apsan nangrime sorkariko chalaigen ine Sangma parakataha.

Manipur a•doko NPP dol, opposition ong•e dongna nanggenchimoba Meghalaya a•dokode maming nangchakeani dongjawa ineba Sangma parakataha.