Shillong, April 19: Adita salrangna skang, West Jaintia Hills a•jani Block 1 jolo donggipa Khanduli songo Karbi Anglong Autonomous Council (KAAC)-ni signboard-ko songani, Block 1-ni ning•o donggipa Mowjem songo a•sel ong•ani aro Block 1-ni ning•o donggipa Khadkasla-oni Umkhyrmi songona Assam sorkarini niam gri rama tariani a•sel ia jolrango so•sojengjeng ong•anirangko nikna man•angahani gimin ia jolrango tom•tomaniko ra•bapilna gita Budbar salo Assam a•dokni ning•o donggipa West Karbi Anglong a•jani official-rang aro West Jaintia Hills a•jani official-rang, West Jaintia Hills-ni Deputy Commissioner (DC) office-o tom•e agangrikangaha.
West Karbi Anglong a•jani official-rangko Deputy Commissioner Krishna Baruah dilbaaha aro West Jaintia Hills a•jani official-rangko Deputy Commissioner BS Sohliya dilangskaaha.
Tom•a matchotani ja•mano ia a•jani damgnini official-rangan kobor ra•timgipa manderang baksa agangrikengon, mikkangchi iandakgipa so•sojengjeng ong•anirang dongtaijana gita ia sima jolo songdongenggipa songni manderang, district administration baksa bakrime kamko ka•na nanga ine parakataha.
A•ja damgnini gisepo mikkangchi ia sima ari jolrango tom•tomaniko rakkiangna gitaba official-rang ku•rachakgrikangaha.
