Guwahati, Oct 3: Sonibar salo, Assam a·dokni Bodoland Territorial Region (BTR)-ni ning·o donggipa Chirang-o sak 500-mangni gita matburing so·otgipa aro bol den·gipa manderang an·tangtangni silchidarerangko pakwate on·angaha.
BTR Administration-ni ning·o donggipa Forest department-ni didianiko man·enba, ia jolrango donggipa matburingrangko aro bol wa·arangko ripinge rakkiangna gita matburing so·otgipa aro niam gri bol den·gipa manderangoni sak 500-na baten, an·tangtangni silchidarerangko sorkarina pakwate on·angaha.
BTR-ni ning·o donggipa Forest official-rangni u·iatani gitade, ia jolrango matburing so·otgipa aro bolrangko den·gipa manderang, ge 254 slairang, bomarang, bolrang aro gulirangko sorkarina pakwate on·angaha.
Bame on·gipa manderangoni matburing so·otgipa mande sakprakna gong 50,000 ka·e aro bol den·giparangnaba dingtangmancha jakni kamrangni bidingo skie on·anirangko dakanggen ineba Forest official parakataha.
Adita salrangna skangba, World Rhino Day-ko maniani somoio, BTR-ni ning·o donggipa Raimona National Park-o matburing so·otgipa sak 57 manderang, an·tangtangni silchidarerangko aro matburingrangni bakrangko sorkarina pakwate on·angahachim ine nikna man·a.
