Boko, March 6: Mongolbar salo, Boko-ni Congress worker-rang, party-ni candidate aro All Rabha Students’ Union-ni gitcham president Ramen Singh Rabha-ko bike rally ong·ate mande ra·bee rimchaksoaniko dakaha. Ia bike rally-ko Rabha-ni dongchakram Kenduguri-oni a·bachenge Boko Rajiv Bhawan-ona kingking dakangaha, jeon hajalni hajal manderang Boko aro Bongaon Block Congress Committee-ni dilanichi tom·dake dongsoaha. Re·baenggipa Assembly election-rango 28 Boko-Chaygaon (ST) constituency-oni an·tangni candidate ong·aniko parakatna Rabha singgako sikaton, pilak manderangan an·saoe chrik-a·boktokaha.
Uandake, Rajiv Bhawan-o ua kobor ra·timgiparangna parakatengon, da·o a·dokko rikenggipa sorkarini kosako matnangenba, uamang manderangna dikdiksanasan kusiniko on·aigiparang ong·a ine Rabha aganangaha. Lak 2 kror ong·nasipile tangkarangko dingtang dingtang scheme-rangni ning·ao man·giparangna sualatna ine sroaha, indiba pangkamgipa silroro-namroroaniko ra·baani bidingo ja·ku de·anirangko nikbreja ine ua aganangaha. “Scheme-rang mangmangde BJP-ko chegipa ong·atna amja. Batanggimin salrango Congress-ba bang·a scheme-rangko ra·baaha indiba election-o ama cha·aha. Da·aloba, me·chikrang scheme-rangni tangkarangko man·enga, indiba me·asarang uarangko koros ka·na nangenga,” ine Rabha talatangaha.
Unbaksana, tribal belt-rang aro block-rango bang·a a·arangko a·palchini manderangna on·e tribal jatrangna kengniko ra·baenga ine ua sorkariko matnangangaha. Constitution-ni Sixth Schedule-ni ning·ao ong·gipa biaprang – Karbi Anglong, Dima Hasao aro Bodoland-oniko bigha lak 1.5 ong·nasipile tribal jatrangni a·arangko dal·dalgipa corporate-rangni dilgiparang jekai Ambani aro Adani-na on·aha, indiba Assam-ni ma·ambioni ong·bagipa jatrangnade ua biaprangoniko a·arangko brena on·jaenga ine ua aganangaha. Indake ua tribal-rangni a·arangko naljoke rakkina kim·kim ong·e chadenganggen ine ku·mikchete on·angaha.
Iana agreba, Assam a·doko Hindutva-ni ning·ao Hindi ku·sikko agangiparang bang·batroroengaha ine Rabha jajrenga gnang aganangaha. “BJP-ara Hindi, Hindu aro Hindustani-ko gamchatbate ra·a indiba Congress-de pangnan pilak jatkon mande ra·a. Assam-ni bang·bata autonomous council-rangkon Congress-ni sasono ong·mitingo a·bachengataha,” ine ua aganangaha.
Na·simang iakoba nina man·gen:
Na·simang iakoba poraina man·gen: USTM, Re-Imagining Teacher Education-ni bidingo workshop-ko a·bachengata
na·simang hubnetwork.in, oniko video-ko niangan baksa poraina man·gen.
Chingko ka·mao mesokgipa social mediarango jarikna man·gen:-
Twitter- twitter.com/nemediahub
Youtube channel- www.youtube.com/@NortheastMediaHub2020
Instagram- www.instagram.com/ne_media_hub
