Mumbai, Nov 13: Bollywood ja·wilwat kal·anio niksenggipa aro dakmesokna changgipa Asif Basra-ko uni dongchakgipa nok Dharamsalao siakosa nikaha. Asif uni dakmesokaniko tamasa dakchakani nok-osa a·bachengachim indake bilsi 1998-osa Tv serial ‘Wo’ ingipao nakatchengaha.

Uni ja·man Millind Soman-ni tarigipa jawilwat ‘Rules-Pyaar Ka Superhit Formula’-oba kal·aha. Uko a·song gimik niksengna a·bachenganide Anurag Kashyap-ni tarigipa jawilwat ‘black friday’ ingipaoni mongsongbate ong·baha.

Ua bang·a jawilwatrango napchapgipani bakko ra·e kalaha jedake ‘Jab we Met’, ‘Once upon a time in Mumbai’ aro gipinrang. Uni tanggitik ia obostao ga·akani darangkon aiao inatbean baksa duk ong·ataha. Ua Sushant Singh Rajput sagi baksaba ‘Kai Po Che’ jawilwato kal·ahachim.