Shillong, Sept 28: India a·songni jakgitel ong·chengani bilsi 75 ga·dapaniko gisik ra·na “Azadi k Amrit Mahotsav”-ko maniani ning·o dingtang dingtang dakgipa bewalo manianirangko ong·atengon, BSF Jazz & Brass band-ni doke-dame mesokanirangko Butbar salo East Jaintia Hills, Umkiang-ni Holy Cross School-o ong·atangaha.
Ia programko ong·atanio, Meghalaya BSF-ni Brass and Jazz band, namnamgipa aro knatobegipa sulrangchi programo doke-dame mesokangaha. Ia musical programme-o mongsongbate sima-ari jolo songdongenggipa skul bi·sarang, skigiparang aro niksenggipa manderang aro sambajol songrangoni manderang sak 300 mangni gita bakko ra·angtokaha.
Programo, BSF Bang-rang uamangni changa-sapaniko jakkale bang·a knaronggipa a·songna ring·mittelani gitni sulrangchi doka-damanirangko dakangenba a·damona tom·bagipa sakantini gisikrangko namen an·saoatangaha.
Iandakgipa dal·a programko ong·atna BSF-ni gita kamko ka·atanina programo bak ra·giparang BSF-ko dingtangmancha mittelpilangenba, mikkangchi ia apsandakgipako ong·attaina nangani giminba manderang parakangaha.
Sipai dolni doke-dame mesokangachi, a·songni sima-ari jolo songdongenggipa manderang, chasong damberangni gisiko a·songtangna dingtangmancha gisik aro ka·tong gimikchi ka·saanikoba donangjolaha.
