Tura, Sept 30: Bristibar pringwalo, Tura-oni Shillong-ona re•angenggipa bus gari, Nongchram-o a•sel ong•e sianggipa aro saknaa man•gipa manderangni nokdangrangna tangka paisarangko gamskachina gita A•chik Holistic Awakening Movement (AHAM), sorkario dabiangaha.

Koborko on•ani gitade, ia bus gario gimik sak 22 manderang songreangengachim indiba bus gari a•sel ong•anio sakdokde siangna gita nangaha aro gipin sak 16 manderangde saknaanirangko man•skana nangahachim.
Indake ong•engon, ia bus gariko saltimgipa mande chu peke gariko salahani a•selsa ia bus gari, Nongchram Ringdi dolongo a•sel ong•na nangaha ine AHAM matnangatenba, ia a•sel ong•anio sianggipa aro saknaa man•gipa manderang pilaknan tangka paisarangko gamskana nanga ine sorkario dabiangaha.

Bang•bata changon MTC bus gariko salgiparang, nangana bate ta•rakdugae aro churangko ringesa garirangko salrongengani a•sel iandakgipa a•selrangko chagrongna nangrongenga ineba AHAM, mikkangchi walo bus garirangko chalaienggiparangna rakbatgipa niamrangko on•china sorkariko didiangaha.