Shillong, Nov 29: Parliament-ni winter session-ko ong·atna skang, NDA-ko dilenggiparangni tom·anio, Citizenship Amendment Act (CAA) 2019-ko ra·galpilchina gita Tura-ni NPP MP aro gitcham Union Minister Agatha K Sangma dabiaha.
Parliament-ni winter session-ko November 29 tarikoni December 23 tarikona ong·atengani gimin ia session-ni bidingo chanchirimna gita Robibar salo National Democratic Alliance (NDA)-ni tom·aniko ong·atanio, CAA 2019-ko ra·galpilchina gita Sangma dabiangaha.
“Manderangni nangnikenganirangko ma·sie anga Citizenship (Amendment) Act 2019-ko ra·galpilchina ma·mong sorkario dabiaha,” ine NDA tom·a matchotani ja·mano Tura-ni NPP MP, kobor ra·timgiparangna parakataha.
2019 bilsini December jao Parliament-o pass ka·gipa aro 2020 bilsini January jao Narendra Modi sorkarini u·iatgipa CAA-ko salgro salaram a·dokrango songdongenggipa manderang jegaltokengachim ine nikna man·a. Skangonin salgro salaram a·dokrango Bangladesh a·songoni niam gri katnape songdong a·chaanirangko nikna man·engani gimin da·o CAA-ko ra·gatanichi Bangladesh a·songoni katnapbagiparang bilongbatgnok ine salgro salaram a·dokrango songdongenggipa manderang kenchaktokengachim.
