Shillong, Feb 13: Sajinmana tikako su·a matchotani ja·man bang·a jatrangni ra·chakna man·gijagipa Citizenship Amendment Act (CAA)ko ru·utgijan a·songni dingtang dingtang biaprango ra·gatgnok ine agananganina jajrengsoenba Meghalaya Youth Congress mijal Sukrobar salo ma·mong sorkarini ia niamko ra·gatna drae ja·ku ga·baenganiko raken jegalataha.
Tol·gipa koborrangni kosako warachakna aro Democracy-ko chel·chakna gita miksongenba dolni social media-ko mijalo a·bachengate on·angani somoio koborna aganengon, salgro-salaram a·dok jolgimikni manderang iako raken jegalgenchimoba ma·mong ia CAA-ko ra·gatdraesa dontelaigen ine Meghalaya Pradesh Youth Congress (MPYC)ni general secretary Fernandez S Dkhar parakataha.
“Meghalaya aro salgro-salaramni gipin a·dokrangoniko CAA-ko ra·galchina dabianiko ma·sichake knae ra·ani pal, sajinmana tikka su·ani matchotahaon CAA-ni ning·o gipin a·songrangchini katdobae songdongpaegipa manderangna a·songo songdongkamna cholko on·na gitasa Union Home Minister Pa Amit Shah parakatskaaha,” ine S Dkhar aganaha.
Ma·mongni iandakgipa kamko jegalengon, a·jani chong·mot songdongkamgipa jatrangni kosako sinjetaniko on·na gita BJP dolni ja·ku ga·baenggipani kosako chinga dakgrikanggen ine MPYC-ni dilgipa parakatenba, a·jao songdongkamgiparangna chanchichake kamko ka·gipade Congress sorkarini somoiosan ine agane, “a·bri jatni manderangna dingtangmancha naljokaniko on·na gita 1947 bilsio Sixth Schedule-ni niamko Congress dol ra·baaha, Meghalaya-na dingtang a·dokko on·aha aro Panchayati Raj-ni ning·o ong·gnigipaonikoba chel·tangataha…” ineba S Dkhar parakatjolaha.
