Baghmara, Oct 25: Meghalaya a•dokni skanggipa Chief Minister Captain Williamson A Sangma-ni chang 33-gipa siani salko Budbar salo, a•dokni manderang gisik ra•e maniangaha.
Baghmara-o ia salko Capt Williamson Memorial Park-o maniangaha aro ia manianio, Meghalaya a•dokni Education Minister aro Rongara-Siju constituency-ni MLA Rakkam A Sangma, mongsonggipa sokgipa ong•e bakko ra•angenba, Meghalaya a•dokko man•anio Capt Sangma-ni on•gilanggipa kamrangni gimin gisik ra•atpilangaha.
Capt Sangma-ni mingnamgipa kamrangni gimin aganangengon, ua mingsing minggamanina aro gam-jinna mikboke kamko ka•gipa ong•ja indiba ka•saani aro niksamsoani gnang an•tangko on•kange kam ka•gipa mandesa ong•achim ine Education Minister aganaha.
Gipin jatrangba Capt Sangma-ni bidingo ma•sie ra•pana man•na gita dingtangmancha uni bidingo ki•taprangko sechina gitaba ua Capt Williamson Memorial Govt College-ni Literature Professor-ko didiangaha.
Top Ten-o SSLC porikkako pass ka•gipa chatro chatrirangna college-rango aro university-rango indin admission-ko on•gen aro Science baksana Mathematics subject-rango name pass ka•gipa chatro chatrirangna dingtangmancha dakchakanirangko on•gen ineba ia tom•anio a•dokni Education Minister ku•rachakaniko on•angaha.
Khelo India Scheme-ni ning•o dingtangmancha ‘artificial football turf’-ko South Garo Hills a•jani Siju Mondal Gitok songo tarina tangka paisarangko sorkari chamataha ine parakatengon, iandakgipa cholko man•a Siju Mondal Gitok songni manderang namen rasong gnangbegipa ong•a ine Sangma aganaha.
Ia salko maniani bak gita dingtangmancha Siju Mondal Gitok songo ong•atgipa football tournament-ni bon•kamgipa kal•susaanikoba ong•atangaha aro ia bon•kamgipa kal•susaaniko Dorenggo aro Nokatgre dolrangni gisepo kal•susaangaha.
Ia salko manianio, 2023 bilsini SSLC porikkao letter mark-rangko man•e 1st division-o pass ka•anggipa chatro chatrirangna tangkarangko aro mittelpilani certificate-rangkoba on•angjolaha.
Capt WA Sangma-ni siani salko uni atchiram song Siju Mondal Gitok songoba gisik ra•e maniangaha.
Apsan daken, Capt WA Sangma-ni chang 33-gipa siani salko Tura-oba maniangaha aro ia manianio, Kharkutta-ni MLA Rupert Momin, GHADC-ni Deputy CEM Nikman Ch Marak, dingtang dingtang MDC-rang, Capt Sangma-ni ma•drangrang aro GHADC-o kam ka•enggipa manderangba bak ra•angtokaha.
Ia manianio Kharkutta-ni MLA, jinmana aganprakangengon, Meghalaya a•dokko aro GHADC-ko man•dile on•angahani gimin Capt Sangma sagiko mittelpilangenba, mikkangchi ugita dilgiparang ong•na aro uni kamrangko ja•rike ka•angchina gita didiani kattarangko aganangaha.
Ia salko manianio GHADC-ni Deputy CEM Nikman Marak-ba jinmana aganprakangengon, Capt Sangma-ni mingnamgipa kamrangko gisik ra•atpilenba, Capt Sangma gita dilgiparang da•o dongkugenchimode A•chik a•songni dingtanganiko nikna man•chongmotgenchim ine aganangaha.
Capt Sangma-ni siani salko gisiko nangbate aro dal•bate manina nangenga ineba Marak ia tom•anio aganaha.
Iakoba poraie nina man·gen: Skulni textbook-rango ‘India’-ni pal ‘Bharat’ kattako jakkalskachina NCERT committee ku•pattia
Watch
Find latest news from every corner of Northeast India at hubnetwork.in, your online source for breaking news, video coverage.
Also, Follow us on-
Twitter-twitter.com/nemediahub
Youtube channel- www.youtube.com/@NortheastMediaHub2020
Instagram- www.instagram.com/nemediahub
