Baghmara, Oct 2: Captain Williamson Sangma Memorial Trophy-na robol kal•susaaniko Sombar salo, a•dokni Education Minister aro Rongara-Siju-ni MLA Rakkam A Sangma, South Garo Hills a•jani Siju Mandalgitok kal•chakramo a•bachengate on•angaha.
Ia robol kal•susaaniko Siju Football Association ong•atenga aro skanggipa kal•susaaniko Sombar salo, Rongara FC baksana Mindikgre FC dolrang kal•susaangaha. Ia kal•susaanio Rongara FC, Mindikgre FC-ko goal 6 chipe, chegipa ong•aha.
Ia robol kal•susaaniko a•bachengate on•angani somoio a•dokni Education Minister, jinmana aganprakangengon, ia Siju Mandalgitok kal•chakramko re•baenggipa bilsirangni gisepon Artificial Turf-chi taridape on•gnok ine ku•rachakaniko on•angaha.
Ia tournament-ni final ba bon•kamgipa kal•susaaniko re•baenggipa October-ni 25 tariko, Captain Williamson Sangma-ni siani salko maniani bak gita ong•atangjolgen.
