Ampati, Jan 15: Meghalaya a•dokni skanggipa State University, Captain Williamson Sangma State University (CWSSU)-ko Sonibar salo, Meghalaya a•dokni Chief Minister Conrad K Sangma, South West Garo Hills a•jani Balalgre songo do•ga oe on•angaha aro ia State University-ko kulie on•anganio Chief Minister-ni Adviser Thomas A Sangma, Education-ni Commissioner & Secretary BDR Tiwari, Education-ni Secretary Ambrose Ch Marak, CWSSU-ni Vice Chancellor RD Shira, Tura Municipal Board-ni Chairman JD Sangma aro gipin official-rangba dongpae bak ra•angaha.
Colleges in Meghalaya have been affiliated to NEHU all these years & this will give them the opportunity to affiliate to our State’s own University.
— Conrad Sangma (@SangmaConrad) January 14, 2023
Meghalaya a•dokni skanggipa State University-ko a•dokni bilsi 50 gapaniko maniani bak gita Chief Minister, a•dokni manderangna pakwate on•angaha.
Ia State University-ko do•ga oe on•angani somoio a•dokni Chief Minister, jinmana aganprakengon, ia Captain Williamson Sangma State University-ara adita course-rangko on•gipa technical university-san ong•aiachim indiba batanggimin bilsirango dingtang dingtang neng•nikanirangko chagrongna nangahani gimin aro a•doktangni University-ko nangengani gimin Cabinet, ia technical university-ko State University dake kulina manchiskaaha ine parakataha.
Ia university-na dingtang dingtang nanganirangko Vice Chancellor-ni janape on•anggipani bidingo aganchakaniko on•angengon, da•o dipet ia university-na nokrang chu•ongkuja aro namdapatna nanganirang bang•en dongkuenga ine ia University-ko nambatsranggipa university ong•atna gita pilakkon bakrime kam ka•china Chief Minister didiangaha.
Meghalaya a•dokoba da•o a•doktangni university dongahani gimin NEHU-o bak ong•na nanggija ia University-on bak ong•pana gita a•dokni ning•o donggipa college-rangna cholko on•ani gita ong•gnok aro manderangni jegalenggipa Common University Entrance Test (CUET)-oni jokna gitaba cholko on•ani gita ong•gnok.
