New Delhi, Sep 5: Casino, race course, online gaming aro uandakgipa joa kal•anirangko chalaiani bidingo chanchirimtaina gita Budbar salo, Group of Ministers (GoM) ba dolsa minister-rangni tom•aniko Meghalaya a•dokni Chief Minister Conrad K Sangma, New Delhi-o dilangaha.
GoM-ni tom•a matchotani ja•man social media gita jinmana parakatengon, dingtang dingtang dolrangni chanchianirangko aro pilak membor-rangni agan-ku•pattianirangko ra•na gita tom•anirangko ong•atani ja•man, iani bidingo bon•kamgipa report-ko Union Finance Minister Nirmala Sitharaman aro GST Council-na pakwate on•angna skangba ainni gita ku•pattianirangko ra•chenggen ine Meghalaya Chief Minister Conrad Sangma parakataha.
