Manipur-o jatgnini gisepo kajia ong·anichi neng·nikanirangko chagrongbatenggipa aro duko ga·akenggipa me·chikrang aro bi·sarangna tom·tomaniko on·china aro a·doko songdongenggipa manderangni gisepo kema ka·grikaniko ra·bachina gita ku·cholsan Nokgipao bi·rimanikoba Mothers Union ua somoio dakdilangaha.

A·dokni job reservation policy-na Meghalaya a·doko ra·gatnasienggipa Roster System baksana Tura songjinmako Winter capital songchina gita dabienggipa A·chik a·songni namgnina re·chakate kamko ka·enggipa dingtang dingtang dolrang baksa golporimna aro dingtang dingtang mamalao neng·nikanirangni bidingo jingjengatenggipa dolrangni agananirangko knatime ra·na gita, re·baenggipa July 24 tariko Meghalaya-ni skotong minister Pa Conrad K Sangma-ni Tura songjinmaona re·banasienganiko West Garo Hills a·jani Deputy Commisioner, Sukrobar salo u·iatangaha.

Inter-Mahari Football Tournament-o Ampang Mahari-rang, pekatgipa samko jakkalani kosako sea gnanggipa jersey-ko gane kal·angtoka

Meghalaya police-ni kamona rimnapgital manderangna appointment letter-rangko on·na gita Meghalaya Police Department, ianpakode batanggimin changrangoni dingtangtee skanggipa changna dal·bee tom·aniko Sukrobar salo, Shillong International Centre for Performing Arts and Culture-o ong·atangaha aro ia programona a·dokni skotong minister Pa Conrad K Sangma baksana dakchakgipa skotong minister Pa Prestone Tynsong, Director General of Police, IPS, Dr. L. R. Bishnoi, Chief Secretary, IAS, Pa D. P. Wahlang, IPS, Pa F. G. Kharshiing, aro IPS, Ma M. G. T. Sangma-maangba bakko ra·angaha.

Tetengkol Youth Club aro District Basketball Association ni Tura Christian Girls Higher Secondary School-o ong•atenggipa All Garo Hills Open Basketball Tournament ni leaque kal•suaanirang name matchotaha. Ia tournament ko July ni 15 tarik-oni a•bachengaha jeon me•sarang dol 14 aro me•chikrang dol 7 bak ra•angaha.

National People's Partyni chadambe dolrang ba National People's Youth Frontni dilgiparang sak sotbri manderangna aro class X aro Class 12ni topper rangna mande ra·aniko mesokna sukribar salo Shillongni U Soso Tham Auditorium ong·atangaha.

A·dokno Health minister Ampareen Lyngdoh Tura aro South Garo Hills a·jarangko wena tik ka·ahachim indiba adita NGOrangni uni Garo Hillsona wenbaaniko jegalsoani gimin ua dontongpilaha. Tura songjinmao sana-banani bidingo chubatgipa officer rang baksa golpogrikna aro rikna-cho·na nangenggiparangni bidingoba golpogrikna ine miksonge re·baengachim.

Ia ong·anggipa obostako, Manipur-ni skotong minister Pa N. Biren Singh, raken jegalangenba dos dakgiparangni kosako raka sastiko on·na Manipur-ni manderangna ka·dongataniko on·angaha.

Minit 127 mang bakroe tarigipa Dominic-ni gital jawilwat ‘Rapture’ ba ‘Rimdogittanga’ ingipako Switzerland a·songo Locarno Film Festival-ko ong·atenggipao a·gilsak gimik susaenggipa Concorso Cineaste del Presente section-na seokako man·ahachim.

Da•o roro bang•bata manderang gari-gora salenggiparang nanga lekkarang donggija aro driving license rang dongija gari-gora salenganiko nikna man•engon Tura ni Traffic Police-rang Te•teng A•ja-o garirangko neng•takate rang•gitik gari lekkarangko sing•sandiaha.