Dibrugarh, Apr 2: Songsalo onbatgipa gadango janggi tangenggipa manderangko tang•doataniara sorkarini kam ong•achim, indake ong•genchimoba, bang•a manderangan sorkarini on•enggipa scheme-rangko man•kujaenga ine nikna man•a.
Dibrugarh Lok Sabha Constituency-ni ning•o ong•gipa Duliajan-o donggipa Shanti cha bagano kam ka•e cha•enggipa, bilsi 51 ong•gipa me•chikma, Renu Bhuyan, sorkarini pilak on•enggipa scheme-rangko man•pakujaenga ine janapataha.
Ua ia scheme-rangko man•pajani gimin gisiko suk ong•gijanikoba parakataha. Indake, ua Kola songoni ong•a aro ia cha bagano salantian hajirana kam ka•e cha•enggipa ong•achim.
Kobor ra•timgiparang baksa agangrikengon Renu, gipinrang sorkarini on•enggipa scheme-rangko man•genchimoba uade man•pa dongkuja ine parakataha. Indake, bang•pagija man•enggipa tangka paisarangchi nokdangko chalaina neng•nikaniko man•a ine janapatengon, Pradhan Mantri Awas Yojna (PMAY) aro Orunodoi scheme-rangna dorgasto gale nipaoba da•alonan ia man•gnirangko man•pakuja ine gisiko suk ong•gija ua aganaha.
Indake, sakgipin kam ka•e cha•enggipa bilsi 45 ong•gipa me•chikma, Malti Tanti-ba, sorkarini on•enggipa scheme-rangko man•pakujaenga ine uaba parakataha. Ua PMAY aro Orunodoi scheme-oniko maming namgnikoba man•pakuja ine aganaha. Ia scheme-rangna nanggipa pilak document-rangkoba uamang on•atahaoba uarangko man•jaenga, indake ong•genchimoba, da•o gitalgipa sorkari rikahaon, ia scheme-rangko man•a ka•dongsoenga ineba ua aganaha.
Bilsi 35 ong•gipa me•chikma, Bharati Shautal-ba, apsan daken pilak nanggipa document-rangko on•manahaoba ia scheme-rangoniko maming namgniko man•kujaenga ine janapataha.
Indake, maini gimin bang•a manderangna, ia scheme-rangko donchange on•enga ine sing•on, bang•a manderangni Aadhaar melijani a•sel aro ong•gija document-rangko on•ani a•selo mitamrangko donchangna nangao ga•akenga, indake ong•genchimoba uamangna dakchakaniko on•gen inenba BJP-ni dilgipa aganchakaniko on•atskaaha.
Indake ong•engon, Assam Tea Tribe Students’ Association (ATTSA), ku•rachakatangko chu•sokatjaengani gimin BJP sorkariko jegalaniko dakatskaaha.
Dibrugarh Lok Sabha Constituency namen gamchatbegipa constituency ong•a jeon, BJP-ni dilgipa Sarbananda Sonowal, AAP-ni candidate Manoj Dhanowar aro INDIA bloc candidate Lurinjyoti Gogoi, sakgittam susaaniko dakanggen.
Iani gisepon, ia constituency-ni ning•o donggipa manderang cha bagano pangchake janggi tanggiparang ong•a aro BJP dol, uamangni bil ama dipet, scheme-rangko on•achi uamangko namnikatna jotton ka•enga ine nikna man•a.
Na·simang ia video-koba nina man·gen:
Na·simang iakoba poraina man·gen: USTM, Microbiologists Society baksa MoU-o soi ka•a
India A·songni Salgro Salaram A·dokni gitalgipa koborrangko ma·sina sikode na·simang hubnetwork.in,-oniko video-ko niangan baksa poraina man·gen.
Chingko ka·mao mesokgipa social mediarango jarikna man·gen:-
Twitter-twitter.com/nemediahub
Youtube channel- www.youtube.com/@NortheastMediaHub2020
Instagram- www.instagram.com/ne_media_hub
