Imphal, Dec 10: Sukrobar salo National People’s Youth Front (NPYF) dolni gita chadamberangni tom•bimonganiko Manipur a•dokni Imphal West-o ong•atangaha aro ia tom•anio Meghalaya a•dokni Chief Minister aro National People’s Party (NPP)-ni national president Conrad K Sangma-ba dongpae jinmana aganprakangengon, chadamberangan a•songni bil aro ra•bianiba ong•enga ine parakangaha.Sangma-ni aganani gitade, chadamberangni bilko a•song namgipa bewalo jakkalgenchimode uan India a•songna dal•batsranggipa bil gita ong•gen indiba chadamberangni bilko jakkalsretgenchimode uan a•songko nisina bilakbatsranggipa silchidare gita ong•skagenchim.

NPP dolni chadamberangna nikjumanganirangko parakangengon, chadamberangni changa sapani kri skie on•anirangko dakna gita dingtangmanchagipa program-rangko ra•gatna, dingtanggipa chadambe dolrangko bikotna aro chadamberangni changa sapanirangko ra•dona cholrangko on•na miksonganian ong•a ine NPP-ni national president parakataha.

‘Early Child Development Program’-rangko ra•gatna nangengani gimin aganangengon, iandakgipa program-rangko ra•gatanichi bilsi 5-oni bi•sarangko dingtang dingtang kamrangni gimin skie on•na man•gen ine Sangma parakataha.