New Delhi, Oct 15: Salgnina ong·atenggipa “4 gipa India Agricultural Outlook Forum, 2020” webminar ko da·al New Delhi ni Krishi Bhawano a·bachengataha. Ma·mongni Minister of State for Agriculture Pa. Parshottam Rupala namjabegipa obostarangni somoio apchangketanirangko man·genoba indakgipa tom·aniko ong·atanina Ministry ko de·mitele aganaha.
Sabisini somio economy ni gita neng·nikanirangko chagronggenoba maidake ge·a gamani a·ba tang·doahachim uko aganengon, 2020-21 ni skanggipa jabri-o ge·a gamani a·bao tang·doani 3.4% ong·aha aro indake tang·doaniara sakanti ge·gipa gamgipa, gisiko nanggipa, ma·mong aro a·dok sorkari rangni bimchipanion ong·aha ineba aganaha.
Re·anggipa somio ge·a gamani aro ge·gipa gamgiparangna niamrangko namdapatgipani bidingo aganengon Sorkarini mongsonggipa miksonganaiara mi misi, me·su samjak aro bolam bite rangko ge·a gamanio bilakdapatanian ong·a aro uarangko namdapatachi na·tok jilani, matburung rangko jilani, samna jakkalgipa sam bol rangko ge·ani aro bija jilani rangkoba nangchape namdapatanian ong·a ine aganaha. A·gilsak gimikon ge·a gamanirangko namdapate ge·gipa gamgipa dolna silroroaniko on·ani aro ong·telaigipa mal gam rangkoba name tange rakkianian chubatgipa gadangni skaniba ong·a aro ia tom·anio uarangkoba chanchigen ineba aganaha.
Neng·nikani somoirango ia programme ko ma·mongni Ministry of Agriculture and Farmers Welfare ni ong·atahanina DAC & FW ni Jakrikra Pa. Sanjay Agarwal de·mitelaha aro adita ja rangna skang ge·a gamani bewalrangko namdapatna ja·ku ga·anikoba talatangaha. Ge·gipa gamgipa rangko dal·gipa gadangona ra·dona Sorkarini gisiko nanganikoba ua janapaha.
2020 o niksamsoanirangko ua aganengon, ge·a gamanio namen tang·doani ong·gen , samjak aro tobe jetgipa bitchil rangkoba namdapatna nishan donenga ine aganaha.
Ge·a gamanirangko pala sim·anio damrangko tik ka·anioba uan dakchakgen aro akam tetmano ka·gni kamrangni giminba niamko namdapatgipao janapaha ineba aganaha.
Tom·anio mongsonggipa chanchiani katta ja·apnagrangara: a·songo aro a·gilsak gimiko namjabegipa sabisichi neng·nikanirangko chagrongani somoio maidake ge·a gamani obostarangko bon·chongdikatgija re·roroataha; ge·a gamani a·barango bewlarangko dingtangataha; India asongo ge·a gamanirangko dingtang dingtang a·gilsakni bakrango ge·a gamani bewlarang baksa chanchapatani aro dal·dapatani; ge·a gamanirango gitalgipa ostrorangko jakkalani; Sorkarioni breenggipa dolrangna dam ragni bidingo gitalgipa rama rangko sandiani aro kamrangko ong·katatani bidingo skie on·ani ong·a.
Tom·anio a·dok aro a·songni officialrang, sagal nalsani ge·a gamani a·bao u·igipa ma·sigiparang, USDA ni Skotong Economist, gipin a·songni embassy rangoni delegate rang, FAO, EU aro OECD a·gilsak gimikni dolrang, ICAR ni gisik a·ning bitgiparang, ge·a gama karkana rangoni seokgiminrang, bading chiwalgiparang aro ge·gipa gamgipa rangni dolrang bak ra·anggen.
