Tura, Jan 15: Changbongagipa Meghalaya Games 2024-ko Sombar attamo, India a·songni President Droupadi Murmu, Tura-ni PA Sangma Stadium-o, Meghalaya a·dokni Governor Phagu Chauhan, Chief Minister Conrad K Sangma, Meghalaya Assembly-ni Speaker Thomas A Sangma, Tura-ni MP Agatha K Sangma, a·dokni Education Minister Rakkam A Sangma, Sports & Youth Affairs Minister Shakliar Warjri, PHE Minister Marcuise N Marak, Power Minister AT Mondal aro gipin dilgiparangni mikkango do·ga oe on·angaha.
Meghalaya a·dokni bilsi 50 gapanio ian skanggipa changna Meghalaya Games-ko West Garo Hills a·jani Tura songjinmao sokachakengani gimin aro ia Meghalaya Games-ko a·songni President a·bachengate on·ahani gimin ia changbongagipa Meghalaya Games-ara namen dingtangmanchagipa ong·engachim.
Ia changbongagipa Meghalaya Games-ko do·ga oe on·anganio a·songni President Droupadi Murmu, jinmana aganprakangengon, India a·songni salgro salaram jolo bang·bata Tribal manderangan kal·susana changgipa sapgiparang ong·ani gimin kal·susaanirangko aro kal·susagiparangko namdapatna gita cholrang bang·en donga ine parakangaha.
India a·songo dingtang dingtang jatrangni nangrime songdong a·chaanian a·songni nitoani ong·a aro kal·susaani a·bao ia cholko ra·e a·songko niksengatna nanga ineba President aganaha.
Salgro salaram a·dokrango kal·susana gisik nanggipa Tribal manderangko, taridapenba changgipa sapgiparang ong·atchina gitaba Murmu didiangaha.
Salgro salaram a·dokrango me·chik kal·susagiparangkoba bang·en ong·katataha ine janapatengon, ia manderangan Olympics aro Commonwealth Games gita dakgipa kal·susaanirango a·songna mikkim rasongko ra·baaha ine a·songni President parakataha.
Re·anggipa antiosan, Rashtrapati Bhavan-o, hockey kal·gipa Sushila Chanu Pukhrambam aro Wushu kal·gipa Naorem Roshibina Devi-na Arjuna award-ko uni jakchi on·aha ine gisik ra·atpilengon, Meghalaya Games gita dakgipa kal·susaanirangko ong·atanichi ia jolrango kal·susagiparangko namdapatna didiani ong·gen ine President Murmu aganaha.
Ia tom·anio ua Hindi ku·sikchi jinmana aganprakangskaengon, ia sin·begipa attamo, konta gittam batpile, ia Meghalaya Games-ni a·bachengataniko senge dongahani gimin ua stadium-o tom·dakgipa manderangko mittelpilangaha.
Iana skang, a·dokni Chief Minister Conrad K Sangma-ba jinmana aganprakangengon, ia Meghalaya Games-ara kal·susaanisan ong·aija indiba ian chadamberangna mikkangchina cholsa ong·engani gimin ia kal·susaaniko a·bachengataniara namen gisik ra·beani somoi ong·aha ine parakataha.
Sorkarini chu·sokatenggipa kamrangni gimin janapatengon, chadamberangan a·dokni aro a·songni dal·batsranggipa gam-jin gita ong·ani gimin ia sorkari, pilak kamrangon chadamberangni bilrangko aro changa sapanirangko jakkalna jotton ka·enga ine Chief Minister aganaha.
Changbongagipa Meghalaya Games-ko saldokna Tura songjinmani dam 16 biaprango ong·atenga aro iano gimik sak 3000-na baten kal·susagiparang, gimik ming 23 kal·susaanirango bak ra·enga.
Watch
Find latest news from every corner of Northeast India at hubnetwork.in, your online source for breaking news, video coverage.
Also, Follow us on-
Twitter-twitter.com/nemediahub
Youtube channel- www.youtube.com/@NortheastMediaHub2020
Instagram- www.instagram.com/nemediahub
