Shillong, Sept 7: HNLC bobil dolni gitcham general secretary Cheristerfield Thangkhiew-ko police-rangni so•ote galanina jegale aro una kakket bichalko on•china dabie Mongolbar salo, ‘Sur Ehrngiew ki Nong Malki’ ba ‘Malki-o songdongenggiparangni ku•rang’ dolni gita jinma tom•tome re•jomaniko aro mombati ra•e tom•bimonganiko Malki kal•chakramo ong•atangaha.
Ia ‘Sur Ehrngiew ki Nong Malki’ dolara KSU, FKJGP, HYC, HNYF aro Seng Samla Malki dolrangni nangrime bikotgipa dol ong•a aro ia tom•anio Cheristerfield Thangkhiew sagini nokdangoniba bakko ra•angtokaha.
Mombatiko Cheristerfield Thangkhiew sagini jonggipa GS Thangkhiew so•dilaha aro uni ja•man Cheristerfield-ni gipin ma•drangrang aro tom•anio bak ra•gipa manderangba so•tokaha.
Ia tom•aniko ong•atanio dingtang dingtang dolni dilgiparang jinmana aganprakengon, MDA sorkari aro Police department-ko matnange aganangtokaha.
Ia tom•anio KSU Mawlai unit-ni general secretary Rapbor Nongrum-ba jinmana aganprakengon, police department, an•tangni bilko Shillong-ni wilwilao mesoke dongana bate sima arirango nambate nirok sandianirangko dako nambatgen ine aganangaha.
Ia tom•anio Cheristerfield sagini jonggipa GS Thangkhiew-ba jinmana aganprakengon, ia a•sel ong•anichi uni nokdang da•onan jagokaoni nampilkugija gita ong•enga ine parakangaha. Uni adagipa dos donggenchim ong•ode uko so•ote galgija, rim•enba nama bewalosa bichal ka•na nangachim ine janapatengon, uko so•ote galna sorkario maiba dongnuani dongama ine ua, a•dokni Chief Minister-ko sing•doangaha.
