Shillong, June 30: Meghalaya a•dokni skotong ong•e re•dilenggipa Chief Minister Conrad K Sangma-ko songbad kingsao ong•gija dake seenba, uni bimingko ong•siatahani gimin kema bi•china gita National People Youth Front (NPYF) dabiangaha.

Iani bidingo kobor ra•timgipa manderang baksa agangrikengon, Budbar salo AITC-ni national general secretary Abhishek Banerjee-ni a•dokona re•baani somoio uni matnange agangipa kattarangko songbado see Chief Minister-ko ong•gija dakgipa biapo donatahani gimin NPYF-ni ku•wattimgipa aro MDC Bajop Pyngrope, ia songbad-ni kosako raken jegalataha.

Ia songbad-ko chalaienggipa manderang, NPP-o kema bi•jagenchimode ia songbadni kosako ‘defamation case’-ko ka•gen ineba NPYF-ni ku•wattimgipa parakataha.

Kragija kattarangchi matnangahani gimin aro manderangko dilsretna jotton ka•ahani gimin ua dingtangmancha AITC-koba jegalataha.