Agartala, Nov 23: Tripura a·doko da·omiting mandeskarang baksa kajia-golmalko ra·baani kosako chakate kam ka·china aro an·tangtangna bil on·ako jakkale pu·onatani somoio vote-rangko on·tokchina gita a·dokni manderangko mol·molangan baksa Tripura a·doko democracy-ni maming niaman dongsrangjaha ine Mongolbar salo parakatani ja·man da·o bang·gija salni gisepon ong·nasienggipa civic poll-na pu·onatna mikkang-mikkang Biplab Kumar Deb sorkario Health minister ong·anggipa gitcham aro BJP dolni MLA Pa Sudip Roy Barman doltangna minggipin dakgipa neng·nikaniko ra·baaha.
Iana MLA hostel-o sakgipin BJP-ni MLA Pa Asish Saha baksa press conference-o agananganio, Tripura-o da·o sorkariko rikenggipa doloni mitam manderangni ka·mikkenatanirangni kosako chakate re·baenggipa civic poll-o bang·a manderang vote-rangko pu·ontokachi dolko warachakchina gita Pa Roy Barman, a·dokni manderangko mol·molangaha.
Iako aganengon, a·dokni skotong minister Pa Biplab Kumar Deb-ko biming minggija Pa Roy Barman-ni matnangatani gita, “an·tangni man·gnina miksonganiko chu·sokatna gita aro ma·mongo BJP dolni dilgiparangni gisepo an·tangko niksengatna gita miksonge CPIM-oni BJP-o napegipa gisik gri manderangko jakkaleming eleksinko ong·atenggipa biapko da·o dakgrikani a·dam gita chacha ong·atskaengaha jeon uamang ramram manderangko vote pu·onjachina gita ka·mikkenataha aro skango Tripura a·dokoniko Communist dolko ra·gale BJP dolko bil-sasonona ra·bana gita tangka-paisako jakkale aro janggitangna misilgija kam ka·bagipa badiaba dolni manderangni kosakoba a·dokni pilak biapchin kajia-golmalrarako ong·atenga.
“A·dokna pilak namroro-silroroaniko ra·bana kamko ka·nasa ia eleksino susaani pal, mandeskako galonna jotton ka·e ong·gija matnange aro sakgipinko jaksi ote chadrapanirangkosa dakskaenga. Uamangko re·dilenggipaan sko tik dongjaha ineba ua matnange aganangkuaha.
Uni aganani gita, BJP dolna kamko ka·enggipa hajal aro lak manderangan uamangni ong·gija kamko ka·e BJP dolna aro a·songni dilgiparangna namgija bimingrangko ra·baenganiko agantokenga, indioba, uamangni dilgipana chakstapgipa bang·gija manderang jemangan chingni dolko chalaiengachim, politicalo chingni mongsong warachakgnigipako uamang ma·sina gita namen ja·manchaka aro chanchina changtokja ineba ua matnangangkuaha.
Tripura a·doko da·o so·so-jengjeng aro kajia-golmalrangko ong·atenggipa aro BJP dolna, mongsongbate a·songni Prime Minister Pa Narendra Modi-na namgija bimingrangko ra·baenggipa doloni bang·gija manderangna BJP doloniba ba uamangni dilgiparangoniba iandaka kamko ka·china gita darangkon didia dongja ineba Pa Roy Barman parakataha.
Unbaksana, a·doko niam aro ge·etaniko rakkiani dongsrangjaha aro a·dokni manderangna aro gam-jinrangna chelchakaniko on·aniba police-oni chu·gimikan dongjaha ineba MLA matnangataha.
Indake ong·engon, Tripura a·doko da·o ong·enggipa saksa-sakgipinko bobil dakani aro kajia-golmalko dontongatna maidaka ja·kurangko de·ahachim da·ona kingkingba a·dokni Home Minister-oniko maming ku·sakoba knakujaenganina BJP-ni MLA sing·doangaha.
Skotong minister aro Home minister-ba ong·enggipa Pa Biplab Kumar Deb-ko jaksi ote aganenba, Home Minister an·tangara iani gimin maiko chanchia maina da·o somoirang re·angengaha aro re·baenggipa salrango namen kenchakna nangbatgnigipa sokbagen ine parakatan baksa una salrang sokbaenga ineba ua aganangkuaha.
Tripura a·doko da·omiting ong·enga obostarangko batanggimin salgnina skangsan BJP-ni national president Pa JP Nadda, national general secretary Pa BL Santosh aro Assam-ni skotong minister Pa Himanta Biswa Sarma jean NEDA-ni chairman-ba ong·enga uamang gimiknan u·iatanganikoba BJP MLA Pa Roy parakatjolaha.
