Shillong, May 24: Chief Minister-ni kamko watanide uni skani gita ong•na man•jawa indiba Meghalaya Democratic Alliance (MDA)-o bakrimenggipa membor-rang aro MLA-rangni jakosa ong•a ine Mongolbar salo, Meghalaya a•dokni Chief Minister aro National People’s Party (NPP)-ni national president Conrad K Sangma parakataha.
Gital Assembly building-ni ‘dome’ be•gropani gimin CBI-chi inquiry-ko dakatchina, ong•jaode chief minister-ni kamko watchina gita BJP dolni dabienggipani bidingo Conrad, ia kattarangko aganaha.
Chief Minister Conrad K Sangma-ni parakatani gitade, MDA-o bakrimenggipa dingtang dingtang dolni MLA-rangsa uko chief minister-na seokahani gimin chief minister-ni kamko watani giminba MDA-ni MLA-rangsa chanchie ja•kuko de•na man•genchim.
CBI-chi inquiry-ko dakchina dabienggipani bidingo janapatskaengon, iani bidingo u•i -ma•sigipa dolchi am•sandianiko dakna nangenga ine ma•sien High Powered Committee, dingtangmancha audit-ko ka•na gita third party-ko songaha ine Chief Minister parakataha.
Mawdiangdiang-o rikenggipa gital Assembly building-ni ‘dome’ be•gropani gimin audit-ko ka•na gita HPC, IIT Guwahati, IIT Kolkata aro IIT Delhi-ko seokmanaha ine Mongolbar salo, Assembly-ni Speaker Metbah Lyngdoh parakatahachim.
