Shillong, April 16: Meghalaya a·doko Inner Line Permit (ILP)ko ra·gatchina dabie Confederation of Meghalaya Social Organization (CoMSO) dol, Sukrobar salo gitik-gitak ong·e a·dokni skotong songjinma Shillong-ni Meghalaya Secretariat office mikkango jingjengataha.
“ILP-ko on·kuja dipet dontongjawa” ine chrik-a·boke agan-toriachi a·dokni Secretariat office-ona napchakgipa biap mikkango jatna aro songsalna kamko ka·enggipa dol CoMSO aro Hynniewtrep Achik National Movement dolni manderang asonge jingjengattokaha.
Chingni da·alo tanggitik ong·e jingjengatanide, ILP-na dabianiko ol·groke ra·jachina gita NPP dolni skotong dilgipa Pa Conrad K Sangma-chi rikdilenggipa sorkarina changsatai mikrakataniko on·na gita ong·a ine CoMSO-ni secretary Roy Kupar Synrem koborna agan-talataha.
Unomiting jingjengatanio bakko ra·e, Confederation of Meghalaya Social Organizations (CoMSO) dolni vice-chairman aro HANM-ni padot ba president Lam Kharbani-ni aganani gita, “Da·o jingjengatanide a·bachenggipasan maina Meghalaya a·dokna naljokaniko aro chelchakaniko on·na gita Inner Line Permit (ILP)ko ra·gatchina dabianiko sorkarini namrenge ra·enganiko nikna man·a.”
Ru·utgijan a·dokni mitam dilgiparang a·songni skotong songjinma Delhi-chi doangtokna am·engani gimin, ia jingjengataniko dakanichi ILP-ni mamlako ma·mong sorkari baksa ning·tubate aro gisiko nangbate agangrikbajolchina dilgiparangko gisik ra·atjola gitaba ong·jolgen ine Kharbani agankuaha.
Iana agreba, uni janapatkuani gita uamangni kingkot dabienggipako a·dok sorkari maibakai ra·chakna jechakode jingjengatanirangko da·ona bateba bilakdapatgen ine mikrakatanikoba on·jolaha.
“Chinga da·alo sak-ritcha mangsan tom·dakaiaha, changgipinode hajalni hajalrangan ong·gen,” ineba ua agandapataha.
