Shillong, Aug 28: West Jaintia Hills a·jani sima jolrango donggipa songrangoni damsa Dawki songo, coronavirus-ko warachaksona gita ja·kuko de·anio Border Security Force (BSF) sipairang baksa nangrime, Bangladesh a·songoni re·baenggipa truck garirangko samrangchi rongtalatsoaha.
Dawki jolo songdongenggipa manderangko COVID-19-oniko naljoke rakkina gita Bakur Covid Management-ni membor-rang, BSF-ni sipairang baksa nangrime, Bangladesh-oni re·baenggipa truck garirangko samrang sate rongtalatsoaha.
Ia ja·kuko de·ani bidingo Bakur Covid Management committee-ni mongsonggipa membor Batista Mukhim, kobor ra·timgiparangna talataniko on·angengon, batanggimin jagnini gisepo Bakur songo COVID-19-ko man·giparang bang·ahani gimin songni manderang mikrake kamko ka·na a·bachengaha aro an·tangtangna simsakanichi da·o COVID man·aniko komiatna man·aha ine parakataha.
“Batanggimin jagnini gisepo chingni songo COVID man·giparang bang·en dongahaoba da·ode COVID man·giparang dongjaha. Chinga vitamin C donggipa cha·anirangko cha·na gisik nangahani gimin aro songtangni manderangna simsakahani gimin coronavirus-ko warachakna man·aha. Iana agreba ia songo donggipa ge 1500 nokdangrangoni ge 1300 nokdangrangde COVID-ni tikarangko su·e ra·mantokahani giminba chinga ia songo COVID-ko warachakna man·aha,” ine Mukhim parakataha.
