Tura, May 16: COVID sajinmani a·sel West Garo Hills a·jani saksa bilsi 53 ong·gipa me·chik bilongbee saeming Robibar pringo a·gilsakko watangaha, jechin anti-gittamrangni gisepo sabisiko man·e sianggiparangoni brigipa ong·enga.
Saani rokomrang a·bachengani salbrirang ja·man, Tura jillani Rongkhon Songgitalo donggipa saksa skigipani kamko ka·gipa bilsi 53 ong·gipa me·chikko Tura Civil Hospital-ona rimbae sanahachim.
“Uo hypertension donge minggipin saaba dongchapa, indake ua May 16 tarikni pring 6:45 bajimango janggi galaha,” ine West Garo Hills a·jani Deputy Commissioner Pa Ram Singh, Robibaro parakataha.
Iano aiao inmananiara, koborni gitade sianggipa mande mija April jani 28 tariko sajinmani skanggipa tikako su·angmanahachim, indiba salskuni ja·man uno dingtang dingtang saani bewalrang dongna a·bachengaha.
Iani bidingo sana-bananio namen sapgipa ba expert-rangni janapatskaani gita, beben sajinmani tikako su·angmanoba ua mande sabisiko champengani pilak niamrangko ja·rikna nangkugen maina tika su·ani samrang be·enni ning·o namedake kam ka·na somoi nanga aro iana baditaba antirangkode nanga.
Robibar pringo siangdapanichi jasani gisepon West Garo Hills a·jao ia sabisiko man·e sianggipa gimikara sakbriona doaha, jechin sabisiko gipatgipa virus-ni ta·raken manderango giproroenganiko mesokaha.
Sabisiko man·giparang aro hospital-rango sanenggiparang bang·roroengani giminan a·jani Deputy commissioner Pa Ram Singh, ia antioba gital dake champenganirangko on·angaha.
Sabisini giproroaniko champengsona chipchangataniko May 16 tarikoni re·baenggipa May 24 tarikona kingking on·angtaiaha, jeon antini bon·achi Sonibar aro Robibar salgnio district gimikon chu·gimik chipchangatenga.
Gital ge·etanggiminni ning·o, nangchongmotgipa bosturangko palgipa pilak dokanrangan pring 8 bajioni kulie 1 bajion chiptokna nanggnok, jekon iana skangde dokanrangko attamni 5 bajionan kulina gita on·achim.
