Tura, April 23: COVID sabisina gnigipa tikako su·anirangko a·bachengatengani gimin District Administration, Bristibar attamchibara DRDA conference hall-o Transport Operator Union-rang aro DTO baksa tom·e chanchirimangaha.

Tom·e chanchirimanio, mongsongbate garirango manderangko salruraenggipa bus, trak, maxi-cab, pickup aro auto garirangni driver-rang, handyman-rang aro sajinmako dakgrikanio mikkangchake kamrangko ka·dilgiparang, COVID-ni gnigipa tikarangko matchote su·china West Garo Hills-ni Deputy Commissioner Pa Ram Singh didiangaha.

Unbaksana, COVID-na dongimin ge·etani niamrangko pilakan namedake ja·rikchina, mask-rangko ganchina, jakrangko rongtale jaksujringchinaba ge·etaniko on·angaha.

Uni gimin, garirango gadoenggipa mande sakantian pangnan mask-rangko ganjringna nanga ine ge·etaniko on·anga baksana, ia ge·etanirangko manijaode niam gita dai gamna nanggen aro niamko pe·genchimode gari salgiparangni license-rangko den·galchina gita DC, DTO-koba ge·etangjolaha.

Ia kenbegnigipa sabisiko dakgrikna gita sorkarini dongimin pilak ge·etani niamrangko ja·rikna nangchongmota ineba West Garo Hills a·jani DC parakataha.