Shillong, April 26: Shillong songjinmani mongsonggipa Bara Bazar ba Iewduh-o dokkan dakenggipa manderang, COVID-19-ni giproroaniko chel•chakna dongimin niamrangko ja•rikama ja•riktokjaenga, uko nina gita Sombar salo Hima Mylliem office-ni gita biapona tanggitik re•ange nianiko dakaha.

COVID-19-ni giproroaniko chel•chakna dongimin niamrang, jekai mask-rangko ganjringani, saksa sakgipinoni chel•tanggrike dongani aro uandakgipa niamrangko ja•rikchina Syiem Mylliem-n Myntri Kharlukhi, Bara Bazar-o dokkan dakenggipa pilak manderangkon didiangaha.

“Dokkan dakenggiparangsan ong•aigija anti cha•na re•baenggipa manderangba pilakan ia niamrangko ja•rikna nangchongmota,” ine Hima Mylliem-ni Syiem aganaha.

Iani bidingo kobor ra•timgiparang baksa agangrikengon, sorkarini dongimin niamrangko pe•genchimode dokkanrangko chipchina ge•etaniko on•gen ine Syiem mikrakataha.