Shillong, May 25: Shillong songjinmani wilwilao COVID-19 sagiparangko sanchakna chu·onga gita palangrangko bariatna a·dok sorkari tik ka·angaha. Rynjah-o donggipa ITI Office, Malki-ni BTC aro Nongrim hills-ni Directorate of commerce and Industries, ia ge·gittam nokrangko da·omiting Corona care centre-rang dake jakkalenggipao ge 150 palangrangko dongen.
Iako, a·dokni dakchakgipa skotong minister Pa Prestone Tynsong-ni Mongolbar salo kobor setimgiparangna u·iatanio, man·adipet gong·raken ia palangrango sagiparangko sanchakna jakkalangna man·gen.
Sajinmani mamlako nipiltaiatanina tom·anganio, minggipin nanggipa chanchianirangkoba agangrikjolaha ine Pa Tynsong u·iatkuaha.
Indake ong·engon, songjinmani dingtang dingtang private hospital-rango COVID-19 sabisiko man·e saenggiparangni gimin tale ra·na gita kamko ka·china health department-na bilko on·aha aro konta 48 somoirangkoba sorkari on·angaha.
“Dingtang dingtang private hospital-rango donge sanenggiparangni koros ong·gnigipao nangchape chinga chanchirimaha. Iandakgipa manderangna chinga mai dakchakaniko on·na man·gen ba iana proposal-rangko health department ra·bana nanggen,” ineba Pa Tynsong u·iataha.
Unbaksana, nipiltaiani tom·aniko ong·atango sajinmako man·e sianggipa nokdangrangni giminba sorkari chanchijolaha aro sorkarini gita mai dakchakaniko sianggipani nokdangrangna on·na man·gen iako health department chanchie ra·bagen.
“A·dokoni PHC aro CHC -ni gadangona kingking corona care center dongna nanganiko chinga nikaha. Uandakgipa sanchakram biaprango komibeoba ge 20 palangrang dongode, songadamni manderangna ian namen dakchakbeani ong·gen,” inba Pa Tynsong parakataha.
Iani giminba pilak mangsongani gnang baksa re·bachina health department-na bilko on·aha.
Da·o ong·enggipa obostani a·sel game-ge·e cha·enggiparangni janggi tangani gimin nangchape uamangna wholesale aro retail market ba ra·rone palani bajarko songna gita agriculture department chanchianirangko ra·baaha jekon Meghalaya sorkari namnike ra·chakangaha.
Game-ge·e cha·giparangni nanga kamrang, bading-chiwalani ba ugitarango nangchape, car pass-rangko on·ani giminba sorkari tik ka·angaha, jekon agriculture department, district horticulture officer aro Dist Agriculture officer-ko man·chape chu·gimik jako ra·e kamko ka·anggen aro iani gimin District Administration-na u·iatna nanggen.
