Tura, April 28: COVID-19 sajinmako man·e, West Garo Hills a·jao ia bilsi mande saksa sitaianiko koborna parakataha.

Sianggipani gimin Sukrobar salo u·iatanganio, a·dokni Health Minister Ma Ampareen Lyngdoh, a·doko Covid sajinmako man·e sagiparang dongoba da·odipetde champengatanirangko dakani gimin a·dok sorkari mamingko chanchisoa dongkuja ine parakatenba, COVID sabisiko champengna pilak dongimin niamrangko manitokchina gita ua, songdonggiparangkoba didiangaha.

Ma Lyngdoh-ni u·iatani gitade, a·dokni manderangko tika su·ani bidingo skotong minister-ni dongpaanio re·baenggipa antio tom·piltaienba chanchirimaniko dakangnasienga.

Unbaksana, COVID sajinmako man·giparang bang·miting somoio sagiparangko nirok-simsake sanna gita dingtang dingtang tarisogimin biaprangkoba mikkangchi a·doko COVID sagiparang bang·taianichi obostarang namjabatani somoio sagiparangna dakchakanirangko on·na gita chu·gimik tarisoenga ineba health minister parakataha.