Tura, May 3: Namgija kamrangko ka·anio mingsinggipa aro pattok nokoni changgni joke katgipa, William A. Sangma-ko ma·sina man·gijagipa manderang mija Robibar attamo slaichi goe so·otgalaha ine koborna parakataha.
Goa man·gipa William Sangma-ra batanggimin salrango bang·a namgija kamrangko ka·ani a·selan pulisrangni mongsong rim·na nangchongmotgipa mandeba ong·achim, uni dingtang dingtang namgijagipa kamrangara, ra·sekdrae ra·anirang, mande so·otanirang aro tangka dabidrae ra·anirangan ong·achim. Indake ua chang-chetna baten pattoko donako man·ahachim.
Ua, pattokoni ong·kata ja·mano Kamrup district-ni ning·o donggipa Boko sepango Garojaan minggipa songo jikgipa baksa dongengachim. Chanchichipani gitade, William Sangma pattokoni jokbaa bakan sakgni manderangko rim·srukanganio jak dongachim aro uni jonggipa unbaksa namgija kamo apsan jak dongpaa ineba parakataha.
Iani bidingo, Kamrup a·jani SP-ni parakatani gitade, ma·sina man·gijagipa adita sak manderang uni nokona re·baenba AK slaichi uni skoo gokame so·otangaha ine u·iataha.
Uni pattokoni jokbaa jagittam mangsan ong·engkuachim, iani gisepon ua ta·raken pilak namgija kamko ka·na an·pilangtaiaha ineba parakataha.
